Ba pynjaboh ka jingshna surok Jowai Bypass ia ka wah Myntdu, pynsangeh DM ia ka jingpyntrei

Syllad | The Rising MeghalayaMay 24, 2024

Namar ka jingsngewkhia halor ka jingpynjaboh ia ka wah Myntdu lyngba ka jingpyntuid khyndew na ka jingshna kaba dang iaid shakhmat ia ka surok Jowai Bypass kaba thymmai na Khliehtyrchi sha Treiongriang, u District Magistrate ka West Jaintia Hills u la pynjari da ka kyndon 144CrPC ha kaba la hukum ia ka Tnat PWD bad ia ka M/s Dhar Construction Company ba ki dei ban pynsangeh mardor ia ka jingpyntrei ia kane ka surok tad hadien ba la shim ia ki sienjam ban khanglad ia ka jingpyntuid khyndew shapoh kane ka wah.

Ka jingshim ia kane ka sienjam ka long kaba kongsan hadien ba la sakhi ia ka jingshah ktah jur jong ka Wah Myntdu bad ki shnat jong ka namar ka jingpyntuid khyndew bad pynlang jakhlia ha ki catchment area ( Ki Shnat Wah) kiba kongsan jong kane ka wah.

Namar kane ka jingpyntuid khyndew na ka jingpyntrei ia katei ka surok, mynta ka um hapoh ka wah Myntdu ka la kylla umktieh bad kaba lam sha ka jingpynsniew ia ka um kaba ka Tnat PHE ka ju pynpoi um sha ki longiing longsem ha sor Jowai.

Na ka liang u District Magistrate u la khang pyrshah ruh ia ka jingtih maw tih shyiap ha lynter jong ka wah Myntdu bad ki jaka ba markhap jong ka.

Nalor kata kane ka hukum ka khang pyrshah ruh ban sait kali ne ban saitjain sait nep, ban bret jakhlia ha shilynter jong kane ka wah Myntdu kumjuh ia ki jaboh kiba mih na kaba shna surok, bad la khang pyrshah ruh ha kaba iadei bad ka jngbret pathar ia ki diapers lane ki sanitary pad hapoh hapoh kane ka wah ne ki jaka ba markhap jong ka.

Shuwa kane ka hukum na kaliang ka bor district, hapoh ka jingialam u S Phanbuh, Executive Magistrate, West Jaintia Hills District, ki engineer PWD Roads Central Division bad ka kynhun Pulit kila jurip iaka jingpyntrei ia kane ka surok.