Ba kuman ka MeECL shong kyllaiñ myngngor ki nongtrei bylla

Syllad | The Rising MeghalayaMarch 12, 2019

SHILLONG:  Na ka daw jong ka jingsngap mynthi jong ka Sorkar Jylla bad ki bor bahalor jong ka Meghalaya Energy Corporation Limited (MeECL), ki nongtrei jong katei ka tnat hapoh ka lama MeECL Progressive Workers’ Union (MPWU) ki la pynlong ia ka jingshong khyllain myngnor kaba shi sngi lynter ha ka Parking Lots ne jaka pynieng kali hajan jong ka Additional Secretariat’s Building haka sngi ba Ar.

Ka MPWU ka dawa ia ka jingpynskhem kam ia ki nongtrei casual kiba la trei slem bha bad ka jingthung ia ki nongtrei kontrak katkum ki kyndon thung kam thung jam jong ka Sorkar Jylla. Ki la dawa ruh ia ka jingsiew tulop kaba mar katjuh na bynta ka juh ka rukom trei ne ‘equal pay for equal work’ da kaba pyntreikam noh mardor ia ka hukum jong ka Supreme Court. 

Shuh shuh kila ia dawa ruh ba dei ban pynsangeh noh mardor ia ka jingthung kam thung jam jong ki nongtrei lyngba ki company ne kontratkor.

Haba iakren bad ki lad pathai khubor, u President jong katei ka seng u Bah Mantiphrang Lyngdoh Kiri, u la iathuh ba ka seng kala dawa na ka MeCEL ba ka dei ban ithuh noh ia katei ka Union kum ka seng jong ki nongtrei casual bad kontrak.

U la ong shuh shuh ba ki nongtrei casual ha Mawsynram, Mawkyrwat, Dalu, Phulbari bad kiwei de ki sheptieng bad rit mynsiem ioh ki duh noh ia la ka kam ka jam ne shah phah trei sha kiwei pat ki jaka namar ia ka kam jong ki yn shimti noh da ka company. Kane ka polsi treikam jong ka MeECL kan wanrah jingeh shibun ia ki samla wad kam wad jam, u la bynrap.

Katkum ka jingiasoi soskular bad ki nongtrei casual bad nongtrei kontrak ha ka 15.8.2018 na bynta ban ioh ki jingmyntoi bapher bapher hynrei haduh mynta kim pat ioh EPF, ESI bad Earned Leave, u la iathuh.  Ka MPWU kala dawa ruh ia ka jingpyntrei noh ia ka minimum wages kumba la buh da ka tnat Labour jong ka Jylla naduh u bnai Kyllalyngkot mynta u snem.

U President ka seng u la iathuh ba kin sangeh shwa ka jingiakhih na ka daw ka MP Election bad lada ki jingdawa jong ki kam urlong kin iakhih biang.