Ba jur ka jingpyrshah la weng ia 144 CrPC haka sngi niew vote, la lah ban iaid rally

Syllad | The Rising MeghalayaMay 31, 2024

Namar ba jur ki jingpyrshah, na ka liang u Deputy Commissioner ka East Khasi Hills,u la hap ban weng noh ia ka jingpynjari kyndon 144 CrPC da kaba pynkylla ia ka kyndon 5 jong ka CrPC kaba khang pyrshah ban iaid proseshon ne rally jingjop ha ka sngi niew vote jong ka ilekshon Lok Sabha ka ban long ha ka 4 tarik Jylliew.

Haba kren sha ki lad pathai khubor ha ka 31 tarik Jymmang, u DC ka EKH u SC Sadhu uba dei ruh u Returning Officer ka Shillong Parliamentary Seat u la ong ba ki la pynlong ka jingiamir jingmut bad ki seng sain pyrthei kumjuh bad ka Synjuk ki Nongsynshar Shnong kiba la pynpaw ia ka jingbym sngew iahap ban pyntreikam salonsar ia ka kyndon 144 CrPC ha baroh kawei ka district.

Na ka liang u DC u la ong ba mynta kane ka kyndon 144 CrPC kan treikam tang hapoh ka jaka niew vote bad ym shabar.

Nalor kata u la ong, “Ngi la bthah ruh ia ki seng sain pyrthei ba kin phah da ka jingthoh ha kaba iadei bad ki lynti surok kiba ki thmu ban iaid paidbah bad ha kajuh ka por ban pynthikna ruh ba kim dei ban pynmih ia kano kano ka huri hura ha kane ka jingpynlong ia ki jingiaid rally.

Ha kajuh ka por na ka liang u DC ula kyntu ruh ia ki paidbah jong ka district, ki seng sain pyrthei ba kin iatreilang bad ki bor pyniaid district na ka bynta ban pynneh ia ka shongsuk shongsain.

Une u khlieh ka district u la pyntip ruh ba ki la pynkhlain shuh shuh ia ki bor pahara khnang ba ka jingniew ia ki vote kan long kaba iaid beit iaid ryntih.

Haba kylli na ka liang u DC u la ong ba baroh ki party sain pyrthei kiba la wan iashim bynta sha ka jingialang ki la pynthikna ban shim ia baroh ki sienjam ban pynneh ia ka suk ka sain haba pynlong ia kine ki jingiaid rally.