Ap khmih ka Sorkar iaka jingai jingmut ka State Education Commission ban pynjem iaki jingeh: Rakkam Sangma
U Myntri ka tnad Pule Puthi Rakkam A Sangma, ula ong ka sorkar ka sngewthuh shai iaki jingeh ki nonghikai bad ki skul bad dei halor kane la thaw iaka State Education Commission bad ka Sorkar ka ap khmih iaki jingai jingmut ka commission ban pynbeit bad pynjem iaki jingyrwit jyrwat haka pule ka puthi.
U Myntri ula ong ia kane haba kren haka jingialang 5th Special Annual Conference jong ki nonghikai hapoh ka lama jong ka Meghalaya Upper Primary School Teachers Association (MUPSTA) kaba long ha madan Khawang Ummulong haka 5 tarik Nohprah. Kane ka conference ka dei ruh shibynta ka jingrakhe iaka jingdap jingdap 30 snem ka jingiaid lynti jong ka MUPSTA halor ka phang “Be a Leader, Be the Difference, Be the Light, Be a Teacher”.
U Myntri haba kren shuh shuh ula ong ka sorkar ka iatakhuh ia shibun ki jingeh naduh ka jingiapher ka rukom ai tulop, ka jingeh ban pyniapher iaki nonghikai sorkar. Ula ong ba kaba eh shuh shuh kalong ba ki don ki skul bad kolej kiba ioh ka jingkyrshan naka sorkar, hynrei ki jingdon jingem ki skul bad kolej kim dei ki jong ka sorkar.
“Ka sorkar ka sngewthuh iaki jingeh bad ban kren ia kane ka mat ka long kaba jwat bad dei halor kane la thaw iaka State Education Commision bad ngi ap khmih iaka jingai jingmut ka commission,” la ong u Rakkam bad ula khot ruh ban wanrah iaka jingiatylli ban jop bad weng iaki jingeh bad kum u myntri ula kular leh ia kaba bha tam ban kyntiew iaka standard ki nonghikai.
Ula iathuh ruh iaka jinghiar ar sut ka jylla haka pule ka puthi hapoh ka Ri haka liang ka Grading Index, bad ka por ka dawa ban shim iaka jingkitkhlieh da baroh lang ban kyntiew iaka pule ka puthi kynthup ki kmie ki kpa, ki nonghikai bad ki ophisar ka tnad pule puthi.
“Ka jingkynrei u drok ruh kala nangjur ha Jylla bad ka Jylla ka wan hakhmat eh haka ri haka jingdon bun ki nongdih drok, kumta ka por ka dawa ban shimlang iaka jingkitkhlieh,” la ong u Myntri bad bynrap ba katkum ka Survey ka kdew ba u khynnah Class 6 u shem jingeh ban ban thoh ban pule kaba ia ryngkat bad ka kyrdan class 2 bad 3.
U Rakkam ula ong “Wat pynleit jingmut than tang iaka jingeh jong ngi, hynrei to ngin phai sha ka jingeh ba iakynduh ki khun ki kti jong ngi bad ka Jylla. Nga, iathuh ia kine kam dei ba ngan kdew kti iano iano, hynrei ban iathuh iaka jingeh kaba la ktah haduh katta katta bad kala dei ka por ban ai mynsiem ia ki khun ki kti jong ngi, bad lada phiel ka rukom pyniaid, ngi dei ban iatreilang ban pynbeit.”
“Naduh academic session ka ban wan, ngin trei borbah ban wad ki lad ki lynti ban pynjem iaka jingeh bad ngi kyntu ia ki nonghikai khamtam ha ki skul sorkar ban ai iaka jingiatreilang ban ai ka jingshakri kaba tam iaki khynnah bad lada phim kwah shuh ban trei pyrkhat da kumwei, kata da kaba shongthait,” la ong u Myntri bad ula ong “Ka long kaba sngewsih ban sakhi ia kine ki jingeh bad dei na kine la pynlong ban thaw iaka State Education Commission ban peit bad bishar ban weng iaki jingeh.”
Ha kane ka sngi nalor u Myntri ka tnad Pule Puthi la iadonlang ka MLA Sutnga Saipung ka Kong Santa Mary Shylla, Adviser la tnad pule puthi u Bah HM Shangpliang, u MDC ka Jowai North u Brightstar Chyrmang bad kiwei kiwei.
La pynkup burom ruh iaki nonghikai bad pynsngew ruh iaka histori jong ka seng bad aiti ruh iaka dorkhas ha u Myntri ka tnad pule puthi ban pynkynmaw iaka jingdawa ka MUPSTA ban kyntiew kyrdan iaki adhoc primary school kiba haduh 844 tylli, ka jingsiew kaba iaryngkat, ban pynjynsur iaka jingthung kam nonghikai kiba khlem pyndep MTET ha ki adhoc skul bad pynjlan iaka rta shnongthait haduh 65 snem nalor kiwei kiwei ki mat jingdawa.
Ha kane ka sngi la pyllait ruh iaka kot sah kynmaw-Souvenir bad la pynphuh pynphieng iaka jingiakynduhlang da ki jingrwai jingshad ba la shim bynta da ki nonghikai haka jingdonlang ki nonghikai na kylleng ki district.
Leave a Reply