All Jaintia Open Boxing Championship ka WJBA ha madan Ladthadlaboh mynta ka sngi yn pynkut

Syllad | The Rising MeghalayaMarch 25, 2023

Ka West Jaintia Boxing Association ryngkat ka jingiatreilang ka District Sports Officer, West Jaintia Hills District ka la pynlong iaka rynsan iakura ba arsngi kaba tip kum ka All Jaintia Open Boxing Championship 2023 ha madan Ladthadlaboh haka sngi Thohdieng.

Kane ka rynsan ia kura yn pynkut mynta ka sngi Saitjain.

Ia kane ka rynsan ia kura la wan ban plie iaka da u kongsan u Superintendent of Police, West Jaintia Hills District u Bikram D Marak haka jingdonlang u Officer Inchage ka Jowai Police Station u S. Manner, ki dkhot nongkitkam ka WJBA bad kiwei kiwei.

U Bikram D Marak haka jingkren ula iaroh iaki dkhot nongkitkam ka WJBA kiba pynlong ia kane ka lympung ban kyntiew iaka sap jong ki khynnah samla bad pynpaw ruh ka jingkmen ban don bynta ha kane ka lympung.

Haka sngi sdang jong ka jingialehkai la pyndep haduh 15 Bout ba la shim bynta ki khynnah kynthei bad shynrang haka kyrdan Sub-Junior, Junior, Youth bad Elite.

Ki rang bad ki thei ialehkai kiba la rung sha ka jingiakhun phainal haka kyrdan Sub Junior ki long u Couttius Synnah. Haka kyrdan Junior ki long u Damewanhi Dkhar, Medris Tang, Dabetmiki Dhar bad u Mynnu-u-emi Khonglah.

Haka kyrdang Youth ki long u Victodio Passah, Chanmi Phawa, Chanbok Warjri bad ka Dakahipaia Lyngdoh.

Haka Elite ki long u Deibormitre Khonglah, Wadamehipaia Khonglah, Pynioladmi Pala, Wachandame Lamare, Heiwadathrang Suchiang bad u Winner Talang.