Ai snam sngewbha ka Social Cell ka Jaiñtia Students’ Movement

Syllad | The Rising MeghalayaApril 30, 2019

JOWAI: Ka Jaiñtia Students’ Movement (JSM) lyngba ka Social Cell jong ka, kaba la thaw kyrpang ban ïarap ïaki para briew kiba donkam jingiarap mynta ka sngi kala leit ban ai snam sngewbha ïa kawei ka longkmie kaba donkam snam ban ïoh ka jingsumar ha Dr. Norman Tunnel Hospital, Jowai.

U Chairman ka Social Cell ka JSM, u Ardipaul Rymbai marsien ïoh jingtip ba katei ka longkmie ka donkam snam marmar la phah ïaki dkhot JSM ban leit ai snam ha katei ka jaka sumar.

U Leningstar Rymbai President JSM la pynkha ïa kane ka tnad namar ba bunsien la ju ïoh ka jingkyrpad ban pynioh snam na kiba bun ha Khasi Jaintia. La thaw ïaka Social Cell ban pynsmat ïaka rukom pynioh jingiarap sha u paidbah ba donkam snam nalor kiwei kiwei ki lad jingiarap sha ki paidbah ba kynduh jingeh haka imlang ka sahlang.

Mynta ka sngi ki don ar ngut ki dkhot jong ka seng  ba kynthup u Phrangki Chyrmang bad Remius Rymbai ki dkhot jong ka JSM.