Ai khublei ka HYC ia u Kontraktor, MLA bad Engineer ka PWD ba tei pyndep iaka jingkieng Rymphum hapoh ka por

Syllad | The Rising MeghalayaOctober 22, 2020

Ka Hynniewtrep Youth Council Laskein Block Circle ka pynpaw ka jingkmen bad ka ai khublei ia u kontraktor uba trei iaka jingkieng Myntang (Rymphum) ha ka por ba biang.

Ka PWD (Rds) kala khang ia kane ka jingkieng kaba pyniasoh iaka Laskein Barato naduh 3 Nailar bad katkum ka jingpynbna la buh tarik ban maramot haduh u Naiwieng 30 tarik, pynban u kontraktor ula lah ban pyndep iaka jingmaramot hapoh ka por kaba la buh wat hadpeng ka jingpynthud u slap.

“Kane ka jingkieng kadei kaba pyniasoh ia bun tylli ki shnong haka thain Mowkaiaw, kata hapdeng ki shnong hapoh ka Elaka Shilliang Myntang bad ka Elaka Raliang bad ka jinglah jong u kontrak ban pyndep haka por kaba lyngkot kan iarap shibun iaki paid nongrep kiban lum ia u kba u khaw na pynthor bad ban pynpoi sha iing lyngba kane ka jingkieng ban lait na leit wan na ka lynt kaba jngai kum na Nartiang-Ionglwit-Barato Road bad Pasyih-Mynso- Mookynshnian Road,” ong u Kular Skhem Sariang, u nongialam ka HYC uba dei peit iaka HYC Shilliang Myntang

“Ka jinglah ban trei pyndep iaka jingkieng kan pynsuk ruh iaki khynnah skul ban ia beh sha ki jing pule kum sha Mawkyndeng Mowkaiaw bad sha kiwei kiwei,” ong shuh shuh u Kular.

U Kular ula ong “Ngi pynpaw ruh ka jingsngewnguh ia ia u MLA ka thain Ma Nujorki Sungoh u ba la shimkhia ban iakren bad ka tnad PWD bad haka juh ka por ngi ai khublei ia u EE PWD North bad ia ki SDO ban pyndep iaka jingmaramot ia kane ka jingkieng.”