Ai Khublei Behdieñkhlam ka Seng Khasi Kmie

Syllad | The Rising MeghalayaJuly 6, 2020

Ka Seng Khasi Kmie,Shillong, ka pynpaw ïa ka jingkmen bad sngewsarong ba ka Seiñ Raij, Jowai, kum ba ju leh man la u snem, mynta ka kynti ruh kala rakhe ïa ka leh Niam Behdieñkhlam ha Nongbah Jowai ban beh thong ïa ka khlam ka ngoh khamtam, ha kane ka por ha kaba, kane ka tyrlep -tyrbun kala saphriang bad lyngshop ym tang hangne ha Meirilum-Meirisan Khasi-Jaiñtia baieit, hynrei, ha satlak kane ka  snieh pyrthei.

Ha kine ka sngi kiba long ka sngi ban pyndep ïa ki Niam ka Rukom, ha ryngkat ka nguh ka dem ha U Blei Trai kynrad U Nongbuh-Nongthaw kaban sa pynkut ha Aitnar, Jowai, ka Seng Khasi Kmie, Shillong, ka ai ka jingïaroh bad khublei kyrpang ïa ka Seiñ Raij, Jowai kaba la lah ban pynlong ïa kane ka Behdeiñkhlam wat hapdeng kane ka saw-ka sian bad ka ai ruh  ka kyrkhu-kyrdoh ryngkat ka duwai- ka phirat, ka kyrpad-kyrpon ha U Blei-Trai kynrad ba kane ka Behdieñkhlam,  ka Seiñ Raij Jowai  kan long kaba ïaid beit-ïaid ryntih bad kaba jop bad ba u khun bynriew ka Bri u Hynñiewtrep Hynñiaw Wasa un ïoh ka koit – ka khiah krat, ka im suk-im saiñ, im palei, tip briew – tip Blei ha ki sngi ki ïa ki ban nang wan.

Kane ka long kat kum ka kyrwoh na u President Seng Khasi Kmie u Rgh Don Kupar Dkhar.