Ai jingmynjur ka Sorkar ban pyntreikam ia ka Meghalaya Journalist Welfare Scheme 2024

Syllad | The Rising MeghalayaNovember 28, 2024

Ka sorkar Jylla ha ka 27 tarik Naiwieng ka la ai ka jingmynjur ban pyntreikam ia ka Meghalaya Journalists Welfare Scheme, 2024.

Haba kren sha ki lad pathai khubor hadien ka jingialang jong ka kynhun Myntri, ka Myntri kaba khmih ia ka Tnad Information & Public Relation ka Kong Ampareen Lyngdoh kala ong “Mynta kane ka skhim kan sdang ban treikam noh bad ngi sngewkmen ba ngin sa pyntip sha ki paralok nongthoh khubor na ka por sha ka por ha kaba iadei bad ki lad jingmyntoi lyngba kane ka Welfare Scheme.”

Katkum ka jingpynpaw ka jong ka na ka liang ka sorkar kan sdang ban pyntreikam noh ia kane ka skhim naduh ka 1 tarik u Nohprah 2024. Ka la ong ruh ba kane ka dei ka jingkyrpad kaba la slem bha na ka liang ki nongthoh khubor ka Jylla.

“Ki la don lypa ki bynta jong ka Journalist Welfare Scheme kiba iasyriem bad ka Journalist Welfare Scheme jong ki snem kiba la dep. Kumta ka nuksa shwa kane, ngi la don ia ka Journalist Welfare Scheme kaba tang T.1 lak na ka bynta kito ki nongthoh khubor kiba khlad. Ki don ruh katto katne ki rule kiba donkam haba kwah ban ioh ia kane ka song jingiarap. Kumta kaei kaba ngi ong hangne ka long ba ka T.1 lak ha kane ka juk ka dei kaba dang duna palat. Kumta ngi la pynkiew ia ka sha ka T. 5 lak,” ka la ong.

Ha kaba iadei bad ka jingleit sumar pang ruh ka la ong ba ki nongthoh khubor kiba don ia ki jingpang kiba jur kin ioh ban shim T. 50,000 ha ka skhim kaba rim hynrei mynta la pynkiew sha ka T.3 lak.

Nalor kata ka pyntip ruh ba ka committee ba la thaw da ka sorkar ban peit ia ka jingpyntreikam ia kane ka skhim bad kan sa rai ia ki rukom treikam jong kane ka skhim.

Haba kylli, ka Myntri ka la ong, “Ngi sngewkhia ruh ia ki nongthoh khubor kiba la pynrung kyrteng kiba donkam ia ka jingphaikhmat bad kiba donkam ia ka jingiarap namar ka jingshakri kaba ki la ai ha baroh ka jingim ka jong ki kum ki nongthoh khubor.