Ai jingmut ka IIT Guwahati ban siang dewbilat ia ka jingkieng Umiam, ha u Naitung yn lah pyndep

Syllad | The Rising MeghalayaMay 14, 2024

U Myntri ka Tnat bording ka sorkar Jylla u AT Mondal u la pyntip ba na ka liang ka IIT Guwahati ka la aijingmut ban siang noh da ka dewbilat ia ka lynti iaid ha ka  jingkieng Umiam (Damsite) bad ba ka jingmaramot ia kane ka jingkieng yn lah ban pyndep tad haduh u bnai Naitung u ban wan.

Haba kren sha ki lad pathai khubor ha ka 13 tarik Jymmang, u Mondal u la ong, “Ha ka taiew ba la lah Nga la leit jurip ia ka dam bad ka jingkylli ka la mih ba la ia ka madan ne ka lynti iaid yn siang noh da ki bitumen ne ka dewbilat. Ngi la iamir jingmut bad ka IIT Guwahati  ha kaba ka la aijingmut ba ngi dei ban siang da ka dewbilat da kaba pynshong nongrim halor kiba bun ki daw.

“Kumta ruh mynta ngi la weng noh ia baroh ki bitumen kaba siang nalor ka jingkieng bad na ka dam bad ruh ia ka jingsiang kaba rim kaba nalor. Mynta ngin iaid noh katkum ka jingai jingmu jong ka IIT,” u la bynrap. U la ong ruh ba ka jingrkhiang jong ka dewbilat ka lah ban shimpor kumba 28 sngi ei ei.

Haba kylli, u Myntri u la ong, “Ka jingthmu kaba nyngkong ka long ban siang da ki bitumen bad ban pyndep noh ia kane ka jingkieng hapoh jong u bnai Jylliew kumba la buh por, hynrei namar kane ka jingdonkam kaba thymmai, kumta ruh kane kan dang kham shim biang sa kumno katto katne por.

Nalor kata u la bynrap ruh ba ki paidbah nongleit nongwan lyngba kane ka surok ki la mad ia shibun ki jingeh hynrei ki dei ruh ban sngewthuh ba kane ka thmu na ka bynta ka jingbha.

“Ngin pyrshang katba lah ban pyndep noh ha u Naitung lane ka taiew ba nyngkong jong u Nailar u ban wan namar haba siang siang da ki bitumen ki kali ki lah ban iaid beit hynrei haba siang da ka dewbilat ngim lah ban shah ia ki kali ba kin iaid lyngba nalor jong ka,” ong u Myntri.

Shuh shuh u Mondap u pyntip ruh ba ka rta jong kane ka dam kan kiew sa sha kumba 20 snem hadien ba la dep ban maramot bad ban pynskhem biang ia ka.