Ai jingiarap ka KSU ia u samla ban leit iashimbynta haka conference ka Asia Youth International Model United Nation ha Malaysia

JOWAI: Ka Khasi Students  Union Jaintia Hills District (KSU-JHDU) kala ai jingiarap pisa ia u samla Mihsalan Truh naka shnong Lumshnong East Jaintia Hills u ba shah jied ban mih khmat ïa ka ri sha ka Conference jong ka Asia Youth International Model United Nation ka ban long hapoh ka Ri Malaysia.

Kane ka jingialang bah jong ki 44 tylli ki Ri ka Pyrthei kan sdang naduh ka 25 tarik u bnai August bad kan kut haduh ka 28 tarik une u bnai. Ka matpdeng kane ka conference kalong “Human Security Agenda in the Globalized World”.

Ka KSU ka kitbok kitrwiang ia u ne u samla  ba un poi suk shaka jaka kaba u thmu ban leit khnang ba u lah ban leh ei ei ynda u la wan phai bad haka juh ka por ka seng ka sngew sarong ruh ba don kum u ne u samla napoh ka thaiñ jong ngi u ban mih khmat kat shaduh ka ne ka lympung baheh jong ki 45 tylli ki Ri.

Ha shwa ban ai iaka jingiarap ka la don ruh ka jingialang lyngkot hapoh ophis treikam jong ka seng ha kaba iaka jingialang la pyniaid da u General Secretary Garland S Manner bad la ioh ruh ia ki jingkren kitbok kitrwiang na u Ohibait Dkhar President, Kwilnis Suchiang Environmental Secretary bad Leningrad Tariang Organising Secretary.

La ioh ruh ka jingkren na u Mihsalan Truh, u nong iashim bynta sha kane ka lympung bad kum u samla u kyrmen ba un lah ban iasaid halor ka jingeh ki samla.