Ai jinghikai ka tnad kam khlaw ban iada pluh ding ki khlaw ha Markasa

Syllad | The Rising MeghalayaMarch 17, 2023

Kum shibynta ban pynshai paidbah halor ki kam pluh ding jong ki khlaw ki btap, ka ophis jong u Range Forest Officer, Social Forestry & Territorial Range, Mairang ka la ioh ban pynlong ia ka prokram pynshai paidbah halor kane ka phang ha Markasa Secondary School, Markasa. La iadonlang u Range Forest Officer ka Mairang Range, u Bah B.M Kharkongor, ki nongtrei ka tnat Fire & Emergency Services, Mairang, ki nongialam shnong bad ki nongshongshnong ka thain.

Ha kane ka sngi, na ka liang jong ki nongtrei ka tnat pynneh mariang bad ki pulit pynlip ding, ha ka jingkren ka jongki, ki la pynpaw ia ka jingsngewkhia halor ki jingjia pluh ding ba khah khah jong ki khlaw ki btap ha ka thain bad ha ka jylla hi baroh kawei khamtam ha ka por tlang, kaba pynjulor shikatdei eh ym tang ia ka mariang bad ki jingthung jingthaw kiba don ha ka hynrei kaba buh jingma ruh wat ia ki longiing longsem jong ki nongshongshnong kiba don markhap bad ki khlaw ki btap.

Ki nongkren kiba la ai jingkren ha kane ka prokram ki la kyntu ruh ia ki paidbah ba kin kiar na ka jingthang rnga pathar, namar kane ka wanrah jingjulor shikatdei eh ia ki khlaw ki btap bad ki la kyntu ia ki paidbah ba kin thawlad thawlynti da kiwei pat ki rukom kamai jakpoh ki bym pynjulor hynrei kiba pynneh pynsah ia ka mariang sawdong. Shuhshuh, ki la kyntu ruh ia ki paidbah ba kin shim ia ka jingkitkhlieh ban sumar ia ka mariang bad ba kin iatreilang ruh bad ka tnat pynneh mariang ha ki prokram pynneh mariang ki jongka kiba kynthup ia ki prokram thungdieng bad kiwei kiwei. (SDPRO, Mairang)