5 tarik u Rymphang ka Kiew Pyneh Rngiew ka Seng Khasi sha u Lum Sohpetbneng

Syllad | The Rising MeghalayaFebruary 2, 2023

Ka Lum Sohpetbeng Committee, Seng Khasi Kmie kan pynlong ïa ka  ‘Kiew Pyneh Rngiew’ ba shi sien shi snem jong ka Seng Khasi sha kliar jong u Lum Sohpetbneng, ha ka 5 tarik, u bnai Rymphang 2023.

Ha katei ka sngi yn sdang  da ka nguh ka dem na Khyrdop Lum Sohpetbneng ha ka por 8 baje mynstep bad ha ka por 10 baje kan don ka nguh ka dem halor ka Duwan jong une u lum ba kyntang.

Na ka liang ka Lum Sohpetbneng Komiti, Seng Khasi Kmie, ka pyntip ba ki Kali yn shah ïa ki ba kin kiew  tad haduh ka por 12 baje  mynsngi bad kiba kwah ban leit phai  noh sha la ki iing ki sem, yn shah ban hiar naduh ka por 2 baje nohphaisngi.

Haba iadei bad kane ka ka jingkiew pyneh rngiew kaba mynta ka snem, u Vice Chairman ka Lum Spohpetbeng Committee ka Seng Khasi Kmie u Rgh Paia B. Synrem u la wan shakhmat ban pathai ia ka khubor sha baroh ki parakur para kha najan bad na jngai ia ki jingpynkhreh pynkhrum ia ka sngi kiew pyneh rngiew kaba shi sien shi snem.

U Rgh Paia u pynpaw ba la khmih lynti ba mynta hi ka snem ba kam  don kano kano ka jingkhang bad ka jingwan ban kiew pyneh rngiew ka long kaba laitluid, da kumta la khmih lynti ia ka jingwan ban iashim bynta da kiba bun.

Haba iadei bad ka surok, u Rgh Paia u iathuh ba ka long  kaba la biang bha naduh naba sdang na khyrdop haduh kliar lum, haba phai sha ka um, u ai khublei kyrpang  ia Chief Engineer ka tnat  PHE kong  ba da lade hi  I la leit ban jurip  ia ka tyllong um bad ha kliar u lum  khnang ba ka jingpynkhreh kan long kaba biang.

Ka komiti ka  kyntu ïa ki paidbah nongwan ba kin ïa snohkti lang da kaba bud ryntih ïa ki rukom pynïaid ïa ki kali bad kyntu ruh ïa ki paidbah ba kin sngewbha ban kiar ha kaba sliew ne thang ding khnang ban lait na ka jingpluh kum ka jingburom ban pynneh pynsah bad ai jingiada ia ki sawdong sawkun jong ka mei mariang.

Kumjuh ruh ban ri kyndong ïa ka khuid ka suba bad ka jingkyntang  jong une u  lum  jong ka jaidbynriew ka komiti ka kyrpad ruh ia baroh ki nongwan ba kin sngewbha ban burom ia ka Mei Mariang bad da ka jingkit khlieh shi met shi met, ia ki jhep ne ki jakhlia  kiba mih na ki jingpyndonkam jong ki nongwanshim bynta ha ka kiew pyneh rngiew  ba phin sngewbha ban ia bud ryntih lang  da kaba lum thup bad bret pat ia ki ha ki jaka theh jhep ne jaboh kiba dei rukom.