4 ngut ki MDC thymmai haka EC u Ma Thombor Shiwat

Syllad | The Rising MeghalayaMarch 10, 2019

JOWAI:  Ka Executive Committee jong ka Jaiñtia Hills Autonomous District Council (JHADC) kaba la lamkhmat da u Ma Thombor Shiwat kum u Chief Executive Member ka don haduh 4 ngut ki MDC ba dang jop thymmai.

Kine ki EM thymmai ki kynthup ïa u MLA barim ka Mowkaiaw bad u MDC Raliang u Ma Robinus Syngkon, u MDC Jowai South u Saron Pasweth na ka NPP, katba ka UDP ki kynthup ïa u Ma Finelyness Bareh MDC Rymbai Khliehriat, u MDC jong ka Bataw Lakadong u Dr. Sankey Shangpung bad u MDC bathymmai jong ka Narpuh u Ma Emlangki Lamare.

Kane ka Executive Committee kadei kaba ïatreilang hapdeng ka National People Party (NPP) kaba don 12 ngut ki MDC bad ka United Democratic Party (UDP) kaba don 10 ngut ki MDC.

Katkum ka jingiakut hapdeng ki nongialam rangbah jong kitei ki artylli ki party ia ka shuki Chief Executive Member yn khlieh da u MDC ka NPP bad kane ka la leit sha u Ma  Thombor Shiwat na Nartiang Umladang katba ia ka shuki Chairman kan leit sha u MDC ka UDP bad kane ka leit sha u MDC ba dang jop ha ka sien kaba nyngkong u Ma Lakhon Biam na Nangbah.

Shuh shuh ka shuki Dy. CEM ka leit sha u Ma Lasky Rymbai, MDC ka UDP uba la jop ar samoi na Tuber.

Kiwei kiwei ki EM ki long u MDC Shiliang Myntang u Ma Ruda-ioo Tang, u MDC jong War West u Ma Het Pothmi, u MDC Musniang Rngad u Ma Phasmon Dkhar, u MDC Mowkaiaw u Ma Winning Garland Sungoh.

Ka tyllong khubor ki iathuh ba ia ka list jong ka Executive Committee jong ka JHADC yn sa pynbna paidbah noh hapoh shi sngi ar sngi da U Lat ka jylla.