3800 ki khynnah kiba la ioh jinghikai na ka Aspire Meghalaya

Syllad | The Rising MeghalayaOctober 2, 2022

Palat 3,800 ngut ki khynnah na 18 tylli ki skul bad kolej ha ki distrik bapher bapher ki la ioh pyntbit ialade ha ka liang ka soft skill training bad ruh ban pynpaw ia la ki sap ki phong lyngba ka Aspire Meghalaya prokram.

Ka Sorkar Meghalaya, lyngba ka tnat treikam jong ka Sports & Youth Affairs, ryngkat ka jingiasnohkti lem ka tnat Education, ka la pynlong ia ka prokram ‘Aspire Meghalaya’ ba la pyntreikam da ka AVENUES, Shillong. Naduh ba la sdang pyntreikam ia ka mynta u snem, palat 13,000 ngut ki khynnah pule na 62 tylli ki skul bad kolej na kylleng ka jylla, ki lah ioh kheit ia u soh ka jingjop na kane ka prokram. La lah ban ithuh ruh ia ki sap ki phong jong kumba 350 ngut ki khynnah pule lyngba ka rynsan pyni sap jong kane ka prokram.

Ka jingthmu jong ka Aspire Meghalaya ka long ban pyntbit ia ki khynnah pule ha kiba bun ki liang shwa ba kin sdang wad kam wad jam, bad ruh ban pynshlur ia ki ha ka ban sei ia ki sap ki phong khnang ba yn ioh ban pyniasnoh ia ki bad ki skhim bapher bapher jong ka Sorkar Jylla.

Ha ka jingkren jong ka ha ka graduation function ha Mawkyrwat, ka Kong Jacqueline Una Kharpuri (MCS), Additional Deputy Commissioner, South West Khasi Hills, ka la ong, “Ki prokram kum kine ki ai jingmyntoi shibun ia ngi ki ophisar ruh ban tip kham bniah bad ban ai mynsiem iangi kumno ba ngi lah ban shakri kham bha na bynta ka imlang sahlang bad ka jylla hi baroh kawei. Ki jinghikai ba phi ioh ki long ban pyntbit ialade shimet ha kiba bun ki liang khamtam ha ka Communication Skill”. Ka la ai khublei ruh ia ka kynhun ba ai training ia ka jingminot jong ki ban iarap ia ki khynnah samla ban pynkhreh na bynta ka lawei jong ki. “Wat ym klet ia ki jinghikai ba phi ioh nangne bad pyrshang ban pyndonkam ia ki ha ka ban pyntbit ia ki sap ba phi don,” ka la bynrap shuh shuh.

U samla Jakusanrik M. Marak, Class 12, Dalu Government Higher Secondary School, u la ong, “Shwa kane ka prokram, nga ju pyrkhat ba ngam don eiei nalade ban noh synniang ha iing ha sem lane ha imlang sahlang. Hynrei kine ki jinghikai ki la iarap ianga ban ithuh shai ia la ka jong ka sap bad nga sngew ruh ba nga la kham shlur ban ia kaba nga ju long.”

Ha ka jingkren jong u ha ka prokram ha Mairang, u Bah Alan B. Rymbai, na ka District Sports Office, West Khasi Hills, u la ong, “Ki don lai tylli ki D kiba long ka nongrim skhem jong ka jingjop – Discipline, Determination bad ka Devotion. Khlem ka discipline bad ka jingmut kaba skhem kan long kaba eh ban poi sha ka thong. Phi lah ban ym pat ithuh ia la ka sap lane tip shai kaei kaba phi kwah ban leh ha ka jingim jong phi, hynrei ki prokram kum ka Aspire Meghalaya ki lah ban iarap ban pynshlur ia phi bad ban ai kata ka jingpynshai lane ka Clarity kumno ba phin nang ban buh ka thong ialade.” U la ai khublei ia ka team Aspire baroh kawei na ka bynta ka jingtrei shitom jong ki ban ai jinghikai ia ki khynnah samla bad ban iarap ia ki ban ithuh ia la ka jong ka sap kaba ki don. “Kaei kaba donkam ban leh nalade hi ka dei kata ka jingmut ba skhem (Determination) bad ban pyrshang nalade shimet hi (Devotion), bad phin lap ba ki lad ki lynti kin plie na bynta jong phi,” u la kyntu ia ki khynnah.

Ka samla Daphilabet Kharbani, 1^st Semester, Nongstoin College, ka la ong, “Nga thrang shisha ban long nongrwai khnang ba ngan lah ban pynpaw ia la ka jong ka sap. Hynrei nga don ruh kata ka jingsheptieng namar ba ngam ju don ‘confidence’ mynno mynno ruh. Dei lyngba kane ka training ba la ai jingmyntoi shibun ia ngi ki khynnah samla ba nga la ioh ia kata ka mynsiem jong ka jingshlur ban ieng ha stage”.

Kawei na ki jingthmu ba kongsan jong ka Aspire Meghalaya ka dei ban iarap khyllie ia ki sap ki phong jong ki khynnah samla ka jylla. Nalor ki workshop ba pynlong ha ki skul, la ai ruh ia ka rynsan ha kaba ki khynnah ki lah ban pyni ia ki sap ki phong jong ki. Ki skul ki don ka bynta kaba kongsan ha kaban jied ia ki nongmihkhmat sha ka distrik ha kaba ki don. Kin don ruh ki District Talent Committee ki ban jied pat ia ki nongmihkhmat jong kawei pa kawei ka distrik sha ka rynsan iakop pyni sap pyni phong jong ka jylla, ha kaba u paidbah jong ka jylla hi un ioh shim bynta ban jied ia ki nongjop ki ban yn sa ithuh paidbah kum kita ki ‘Aspire Meghalaya Stars’.

Ki 18 tylli ki jaka pule kiba la pyndep ia ka training jong ka Aspire Meghalaya ha une u bnai ki kynthup ia ka Shillong Commerce College ha East Khasi Hills; Tirot Sing Memorial College, Langtor Higher Secondary School, Kynshi Higher Secondary School bad Pariong Presbytery Higher Secondary School ha Eastern West Khasi Hills; St. Mary’s Higher Secondary School, Nativity Higher Secondary School bad Hynriew Shnong Higher Secondary School ha South West Khasi Hills; Nongstoin College bad Lyngngam Presbyterian Higher Secondary School ha West Khasi Hills; Don Bosco Higher Secondary School ha Ri Bhoi; Rymbai Government Secondary School ha East Jaintia Hills, Sacred Heart Higher Secondary School bad Dalu Government Higher Secondary School ha West Garo Hills; Loyola College ha East Garo Hills; Adokgiri Secondary School ha North Garo Hills, St. Francis De Sales Secondary School ha South Garo Hills; bad Ampati Degree College ha South West Garo Hills. (Contributed)