37 tylli ki coke factory ha rilum Jaintia, 14 tylli ïoh NOC tang hapoh 5 bnai

Syllad | The Rising MeghalayaMarch 25, 2021

Tang hapoh 5 bnai naduh u bnai Naiwieng 2020 haduh u Lber 2021 ka Jaintia Hills Autonomous District Council (JHADC) kala ai NOC haduh 14 tylli ban pynieng ïaki kharkhana saiñ rnga dewiong (Coke Factory) sha ki riew shimet bad ki company.

Kane ka jingai NOC ka JHADC kala paw pyrthei haka kynta kylli jingkylli haka dorbar mang tyngka 2021-22 kaba long ha sngi Palei kaba la wanrah da u MDC ka liang pyrshah u Awhai Andrew Shullai.

U Chief Executive Member JHADC ma Thombor Shiwat, ula ong ba naduh u Naiwieng 2020 haduh Lber 2021 ka Executive Committee kaba ula ialam kala pyllait haduh 14 NOC sha ki riew shimet bad ki company bad seng kharkhana Coke Factory ha East bad West Jaintia Hills District.

U ma Andrew ula ong “Imat kane ka jingseng kharkhana sain rnga dewiong kadei kaba myntoi bha.”

Ula kylli biang kiei ki kyndon ba ki nongseng kharkhana ki hap ban bud, ka jubab na u CEM ula ong ba ki dei ban ioh ka NOC na ki shnong, ki Dolloi jong ki Elaka, ka Single Window Agency, Ki kot ki sla ba iadei bad ki company bad kiwei kiwei.

Nalor kine ka don ruh ka kyndon kaba la buh ha kaba kine ki kharkhana kim dei ban jan sha ki um ki wah ban lait naka jingjakhlia ki um ki wah, ong u CEM.

Shuh shuh u CEM ula ong ba haba don pat ka jingpyrshah na ki shnong lane lada lap ba kine ki kharkhana ki iaid lait iaki kyndon bala buh ka konsil, kine ki kahrkhana kim lah ban ioh iaka NOC ban seng kharkhana sain rnga dewiong.