30 tarik ka jingïalang ba nyngkong eh ka North East Forum for Indigenous People

Syllad | The Rising MeghalayaApril 28, 2019

SHILLONG: Ka North East Forum for Indigenous People (NEFIP) kan pynlong ia ka jingialang pyrkhat kam kaba nyngkong eh ha ka 30 tarik une u bnai ha Nongbah Shillong.

Ka NEFIP kadei ka synjuk ki sengbhalang na ka thaiñ Shatei Lammihngi kaba la seng ha Imphal Manipur ha une u bnai Iaiong. Na Jylla Meghalaya ka Confederation of Meghalaya Social Organization (CoMSO) ruh ka ïasohlang bad ka NEFIP.

Ha ka jingialang kaba long ha Imphal, Manipur, ka NEFIP kala shim katto katne ki rai kiba kongsan, kata ban pyrshah ia ka Citizenship Amendment Bill, ban pyrshah ruh ia kino kino ki aiñ ki ban iohlong nongshong shnong ka Ri India ïa ki bar ri. Ka NEFIP kan ialeh pyrshah ia ki polisi treikam ka sorkar Kmie lada ki ktah mationg ia ka jinglong tynrai ka jaidbynriew kane ka thain, ka kyndew ka shyiap bad ki hok kyrpang ki trai Ri trai muluk.

Ka NEFID kan kyrshan ruh ïa ki sengbhalang na ki jylla bapher kiba dawa ia ki aiñ kum ka Inner line permit system bad kiwei ki aiñ ban iada ia ka jingioh rung bad sah ki mynder ha ki jylla bad kane ka synjuk ki sengbhalang kan long ka kynhun kaban ieng iada bad kyntiew ia ki trai muluk ha ka dong ka thain hi baroh kawei.