19 ngut ki MDC ba thymmai ha JHADC rai ki paidbah jong ka Ri Lum Jaintia

Syllad | The Rising MeghalayaMarch 2, 2019

JOWAI: Kane kan dei ka sein kaba nyngkong eh ha ka histori jong ka elekshon jong ka Jaiñtia Hills Autonomous District Autonomous District Council (JHADC) kaba la wanrah ia ka jingkyndit kaba khraw ia baroh ki nongshong shnong jong ka Ri Lum Jaintia bad ka Jylla Meghalaya baroh kawei haba ki paidbah ki la rai ban jied haduh khathyndai ngut ki MDC kiba thymmai.

Kumba yn shu pynkynmaw ka jingjied jong ia ki nongmihkhmat ka la long ha ka 27 tarik u bnai Rymphang mynta u snem ha ki 29 tylli ki constituency hapoh ka JHADC bad ka jingniew vote ka long mynta ka sngi ha DC’s Ophis Jowai ha ka jingpahara kaba jur bad ki jingpyrkhing bha khnang ban tehlakam ia kino kino ki jingkulmar bala ban mih.

U Chief Executive Member jong ka JHADC u Ma Madonbai Rymbai u ba long u kyrtong jong ka NPP u la shah pynrem ha ula bakha u Ma Lakhon Dkhar uba long u kyrtong shimet na Khliehtyrchi-Sohmynting Constituency.

Katba u Chief Executive Member barim bad u kyrtong UDP u Ma Moonlight Pariat ula shah pyndem tdong ha u kyrtong ka NPP u Bah Saron Pasweth na ka Jowai South Constituency.

U Ma Lakhon Biam u kyrtong jong ka UDP u la pynshongthait noh ia u Ma Shemhok Garod u MDC ka NPP na ka Nongbah Constituency, Katba Bah Jesse Suiam u kyrtong jong ka NPP ula pynrem noh ia u Ma Laitsing Shylla u MDC jong ka Congress na Ummulong-Moodymmai Constituency.

Ka kyrtong kynthei kaba marwei ha kane ka elekshon JHADC kaba long ruh ka Deputy Chairperson jong ka JHADC ka Kong Violet Lyngdoh jong ka NPP ka la sha pynshongiing noh ha u Ma Finelyness Bareh.

U MLA barim jong ka Mowkaiaw U Bah Robinus Syngkon u ba la iakhun ia ka elekshon MDC na Raliang Constituency u la poi sha ka thong da kaba pynrem ia u Bah Bison Roy Iano.

Ha Shangpung Konstituensi, u kyrtong jong ka UDP u Ma J Treilang Suchiang u la pynshaiong ia U MDC jong ka thain u Bah Kilometres Lyttan bad u Bah Brightstar Chyrmang u kyrtong ka NPP u la pynrem noh ia u kyrtong jong ka UDP bad uba long u MDC ka Jowai North u Bah Marki Mulieh.

Na ka Mukhla Wahiajer Constituency, u kyrtong shimet bad u briew jong u Ma Wailadmiki Shylla u MLA ka Jowai u la pyndem tdong noh ia u Ma Hermon Phawa u MDC jong ka Congress na Mukhla-Wahiajer Konstituensi katba u Ma Eveningstar Teron u kyrtong jong ka NPP u la pynrem noh ia u Bah Suklang Shylla u MDC ka UDP na ka Nongjngi Constituency.

U Waheh Chnong barim jong ka Namdong-A u Ma Dawan Lyngdoh bad u kyrtong jong ka UDP u la pynshaiong ia u MDC ka NPP u Ma Phein Nanglein na ka Mynsngat-Khanduli Constituency katba u Habahun Dkhar u kyrtong jong ka NPP u la jop ia ka Saphai Konstituensi da kaba pynrem ia u kyrtong ka Congress u Rikut N Parien bad na kane ka Constituency u MDC u Ma Chanky Lyngdoh u la khlem iakhun shuh ia ka elekshon.

U kyrtong jong ka Congress U Ma Aiborlang Shadap u la jop ia u MDC jong ka NPP u Ma Rio Sten na Barato Mukroh Constituency bad u Ma Lomris Lyngdoh jong ka UDP u la pynrem ia u Bah Skhembok Suchiang u MDC jong ka NPP na Muthlong-Sohkymphor Constituency.

U Ma Krison Langstang u kyrtong jong ka UDP u la jop na ka Sumer haba u MDC u Ma Phillip Tangliang u khlem iakhun ia ka eleshon. Katba U Ma Emlangki Lamare u kyrtong jong ka UDP u la pynrem ia u Ma Descous Pohshna u MDC jong ka Congress na Narpuh Constituency.

U Kyrtong jong ka UDP u Dr Sankey Shangpung u la jop na ka Bataw Lakadong da kaba pynrem ia u Joinriwell Pyrtuh u MDC ka NPP katba U Ma Gillroy Tariang jong ka NPP u la jop ia u Ma Lamdibok Sumer u MDC jong ka UDP na War East.

Ki MDC kiba wanphai biang sha ka iing dorbar thawain jong ka JHADC ki long u Ma A Andrew Shullai jong ka Congress na Jowai Central, u Ma Thombor Shiwat (NPP) na Nartiang Umladang, u ma Het Pohthmi (NPP) na War West, u Ma Holando Lamin (INC) na War Central, u Bah Richard S Lyngdoh (IND) na Sutnga Nongkhlieh, u Ma Arbor Hima Darnei (INC) na Saipung, u Phasmon Dkhar na Musniang Rngad, u ma Lasky Rymbai na Tuber, u Ma Winning G Sungoh (UDP) na Mowkaiaw bad u Ruda Ioo Tang (NPP) na Shiliang Myntang.