17 tarik yn sdang pynlong iew biang ha Jarain, phah pyndam ka JHADC iaka iew beaiñ ha madan Sawshnong

Syllad | The Rising MeghalayaOctober 16, 2020

Ka iew Jarain kaba pyniaid da ka Amwi Ar Lyngdoh kan plie biang naduh ka 17 tarik une u bnai, hadien ba la dep ban pynkhuid iaka  haka sngi Palei, katba ka iew kaba la pynlong ha madan Sawshnong jong ka Amwi Ar Lyngdoh, ka Jaiñtia Hills Autonomous District Council (JHADC) kala phah pynsangeh shisyndon namar ba la shna beaiñ ia kane ka iew.

Ha kine ki khyndiat sngi, ka shnong Jarain lyngba u kyrwoh bala phah da u Tam Pamthied la kynnoh ba u Dolloi ka Elaka Amwi, u ma Jemewell Pyrtuh ula thombor iaka shnong naduh ka jingjied acting Waheh Shnong bad ruh ban plie iaka iew Jarain khlem da burom iaka shnong Jarain.

Katkum ka jingkynnoh u Tam Pamthied ka kdew ba ka iew kaba pyniaid ka Amwi Ar Lyngdoh, ka dei ka iew jong ka shnong Jarain, hynrei haba peit iaki kot ki sla jong ka JHADC pat katei ka iew ka hap haka jingpeit jong jong ka Amwi Ar Lyngdoh, kaba ka JHADC ka ai iaka bhah (share) sha ka committee jong ka iew Amwi Ar Lyngdoh Jarain Pvt market la bun  bun snem.

Haba peit iaki kot ki sla ka don kaei kaei sha lyndet ha kaba iadei bad kane kane ka iew Jarain, hynrei ki kot ki sla kiba mih na JHADC, ka bor ban peit iaki iew nongkyndong, ka pynshisha ba ka Iew Jarain ka hap haka Amwi Ar Lyngdoh. Haka juh ka por ka JHADC kala bthah ia u waheh shnong barim ka Jarain u Kliarbha Sana ba u dei ban pynsangeh shisyndon iaka iew beain kaba long ha Madan Sawshnong, ka jaka kaba hap haka jingpeit ka Amwi Ar Lyngdoh (Katkum ka shithi 8 Nailur (September) 2020).

“La bthah ia phi ban pynsangeh noh shisyndon ia ka iew kaba phi pynlong ha katei ka jaka lym kumta ka ophis kam banse ban shim da kiwei pat ki kyndon pyrshah ia phi bad ruh ban aiti iaphi sha ka bor jong ka aiñ,” la ong ka shithi kaba la soi da ka special officer, JHADC.

“Kane ka jingpynlong ne shna iew jong phi khlem da ioh bor na ka District Council ka long pyrshah ia ka Section-3 jong ka Regulation “The Jaintia Hills Autonomous District (Management and control of markets) Regulation, 1975,” ong shuh shuh ka shithi ka special officer.

Nalor kata kala pan report ruh na Dolloi bad u Acting Waheh Shnong Jarain halor ka jingpynlong iew ha katei ka jaka, kaba kila iathuh ba ia kane ka iew la seng haka por ba sdang ka jingkhang khyrdep naka bynta ban iakhun pyrshah iaka khlam COVID bad la pynlong iew ha kane ka jaka ne ka madan Sawshnong.

Ka jingkynnoh ki nongshong shnong ka Jaraiñ kadei ka jingkynnoh ka bym don nongrim, ong u Dolloi ka Elaka Amwi. “Nga khlem leh donbor nga ïaid katkum ki aiñ ki rule ba la bthah bad bynshet ha nga bad kano kano kaba nga leh nga leh lyngba ka jingiatip lang ka Managing Committee jong ka Ïew”, ong u Dolloi ka Ekala Amwi.

Ula pynshai shuh shuh da kaba ong ba, “Hadien ba ka ophis jong ka SDO bad JHADC ki la bthah ia nga ban plie ia ka ïew da kaba pynbiang iaki dkhot jong ka COVID-19 Management Committee bad nga la pynbna ban plie noh iaka ïew haka Jaraiñ naduh ka 17 tarik mynta u bnai”, ong u Dolloi.

Ha kaba iadei bad ka jingjied Waheh Shnong haka Shnong Jaraiñ, “Kane ruh nga ïaid katkum ka aiñ jong ka District Council namar ba la kut ka por treikam jong u Waheh Shnong ka Jaraiñ”, ong u Dolloi ma Pyrtuh.