15 sngi ai por ka MoE ia ka Inquiry Committee ban aiti ia ka kaiphod halor ki kam ka skulbah NEHU

Syllad | The Rising MeghalayaDecember 2, 2024

Ka Ministry of Education ka la ai por biang sa 15 sngi ia ka Inquiry Committee jong ki arngut ki dkhot kiba pynlong ka jingtohkit halor ki jingkynnoh pyniaid kam ba bakla bad ka jingbym lah pyniaid beit ia ki jingtreikam hapoh ka skulbah North Eastern Hill University (NEHU) ba kan aiti ia ka kaiphod.

Kane ka la wan long hadien ba ka jingbuh por ia ka Committee ban pyndep ia ka jingtohkit ka la kut noh ha ka 29 tarik Naiwieng .

Ha ka shithi ba la pynmih da u Under Secretary ka Sorkar India u DK Himanshu sha u Chairman ka Inquiry Committee, NEHU bad Chairman barim ka UGC u Prof DP Singh ha ka 29 tarik Naiwieng ka la ong, “Ha kaba iadei bad ka shithi ka Ministry kaba 14.11.2024 bad ka shithi u Chairman jong ka Inquiry Committee kaba 28.11.2024, ka la ong ba ka bor ba dei khmih ka la ai bor ban pynjlan biang sa 15 sngi ban pyndep ia ka jingtohkit bad ban aiti ia ka kaiphod.”

Ha ka 14 tarik Naiwieng, ka Ministry of Education ka la thung ia ka kynhun jong ki arngut ki dkhot ban tohkit halor ki jingkynnoh pyniaid kam bakla bad ka jingbym lah ban pyniaid beit ia ki jingtreikam hapoh ka skulbah.

Ia kane ka rai la shim hadien ka jingiakhih shah thngan ba khlem pud ba la ialam da ka North Eastern Hill University Students Union (NEHUSU) bad ba la kyrshan da ka Khasi Students’ Union (KSU – NEHU Unit) ban dawa weng kam mardor ia u Vice Chancellor u Prof PS Shukla, u Registrar bad Deputy Registrar.

Ha ka 25 tarik Naiwieng, ka Committee ki arngut ki dkhot ki la iakynduh bad pynsngew sha baroh ki kynhun seng ka NEHU kaba kynthup ia ki samla pule, ki nonghikai bad ki nongtrei kiba la phah ia ka khubor kaba shai kdar ba kam pher la ka jingmih na kane ka jingtohkit ka long kumno kumno ruh, hynrei kin ym lah satia ban dang pdiang ia ka jingwanphai biang u Vice Chancellor ba mynta sha ka skulbah.

Ha ka hukum ka Ministry ka la ong, “Namar kine ki jingpynsngew kiba khia jong ki samla pule, ki seng jong ki samla pule bad ki khubor kiba la mih lyngba ki lad pathai khubor, ka MoE ka la shim ia ka rai ban thung ia ka Inquiry Committee ban pynlong ka jingtohkit halor ki jingkynnoh pyniaid kam ba bakla bad ka jingbym lah ban pyniaid ia ki kam hapoh NEHU, Shillong.”

Ka la ong ruh ba ki jingkynnoh ki la poi sha ka jingtip jong ka Ministry, kata kaba kynthup halor ka jingnang hiar kyrdan jong ka skulbah, ka jingthung kam kaba jyrwit jyrwat, ka jingleh bym suitniew halor ka jingdonkam ia ki jingtei ba kongsan bad ka jingleh mynthi jong u Vice Chancellor.