14 tarik Nailar yn sdang ka pre quarter final Third Div ka WJDSA

Syllad | The Rising MeghalayaAugust 11, 2023

Ka wat kaba nyngkong jong ka jingialehkai Third Division Football Tournament kaba pyniaid da ka West Jaintia District Sports Association (WJDSA) kala poi noh sha kaba kut haka sngi Thohdieng bad la buh tarik ban sdang noh iaka wat ka ar ne pre quarter final naduh ka 14 tarik Nailar.

Haba phai sha ka jingiakhun kaba long haka mynta ka sngi, ka Madan Thadmuthlong kala jop da3-1 iaka Royal Pole Mihmyntdu. U Precious Tang ula the par kol 5’ & 27’ bad u Samsauru Papiah haka minit 45’ kaba la biang pura iaka Madan Thadmuthlong ban khur iaka nam jop bad buh jaka ialade haka pre quarter final. Shikol ka Royal Pole Mihmyntdu la thep da u Marsowki Suchiang haka minit kaba 70’+1

Ha kawei pat ka jingialehkai ka Pasyih Cultural ka la pynliem da 3-2 iaka Kseh Sylle Ialong. Na kaliang ka Pasyih la thep da u Wansaki Rymbai 56’, u Armi Siangshai 59’ bad u Iaineh Suchiang 65’. Katba ka ar kol jong ka Kseh Sylle Ialong la thep da u Iahluti Dhar 7’ bad u Niawki Phawa 67’

Ka jingiakhun Pre Quarter Final ka sdang da ka jingiakhun hapdeng ka Risingsun Mukhla pyrshah iaka Mukhla Umlangshor haka por 10.00 baje mynstep. Ka Newhill pyrshah iaka Mookaswan dongwah haka por 12.00 baje nohphai sngi ka Lumbhahdakha pyrshah iaka Madan Thadmuthlong haka por 1.30 baje nohphai sngi bad ka Mookyrdup pyrshah iaka Lutituber haka por 3.00 baje janmiet.

16 tarik Nailar, ka Lumkhangdong pyrshah iaka Pateinki Sabah, Mulang Ialong pyrshah iaka Moodop Royal, Madankynsaw pyrshah iaka Myrjai bad ka Da i Hi Mynsngat pyrshah iaka Iooksi Youth Welfare.