11 tarik u Iaiong ka elekshon Lok Sabha; sdang treikam ka Code of Conduct naduh mynta

Syllad | The Rising MeghalayaMarch 10, 2019

SHILLONG: Ki paidbah jong ka jylla Meghalaya kin jied ïa u nongmihkhmat bathymmai sha ka iingdorbar thawain jong ka Lok Sabha ha ka 11 tarik u bnai Iaiong mynta u snem bad ia ka resol pat yn pynbna paidbah lang haka 23 Jymmang bad ka code of conduct ruh ka la sdang treikam naduh mynta ka sngi bad kano kano ka jingpynkhein ia ka yn shah pynshitom da kaba tyngeh.

Katkum ka jingpynbna jong ka Election Commission of India (ECI) hynne ka janmiet, ia ka elekshon ba heh duh jong ka Ri India kan long ha ki hynniew bynta ne phase kaban sdang Phase 1- 11 tarik u Iaiong, Phase 2- 18 Iaiong, Phase 3- Iaiong 23, Phase 4- Iaiong, Phase 5- Jymmang 6, Phase 6-Jymmang 12 bad Phase 7- Jymmang 19.

Haba iadei ba ka elekshon Lok Sabha ha Meghalaya, ka jingpynmih ia ka gazette ka long ha ka 18 tarik mynta u bnai, ka tarik kaba khatduh ban thep kyrteng ban iakhun eleshon ka long 25 tarik mynta u bnai, ka tarik ban leh ia ka scrutiny ka long 26 tarik mynta u bnai, ka tarik ban weng ia ka jinglong kyrtong ka long 28 tarik mynta u bnai, tarik ban thep vote ka long 11 tarik u bnai Iaiong, ka tarik ban niew vote ka long 23 tarik u bnai Jymmang bad ka tarik ba dei ban pyndep ia ka eleshon ka long 27 tarik u bnai Jymmang.

Haba iakren bad ki lad pathai khubor mynne ka janmiet u Chief Electoral Officer jong ka Jylla U Bah FR Kharkongor IAS u la iathuh katkum ka electoral roll kaba khatduh bala shon ha ka 17 tarik u bnai Kyllalyngkot mynta u snem ka jingdon jong baroh ki nongthep vote ha ka jylla ki  long 18,92,716  kaba kynthup ia 9,56,137 ngut ki kynthei bad 9,36,579 ngut ki shynrang kaba pyni ba ki kynthei ki tam haduh 20 hajar ngut ia ki shynrang bad shuh   shuh 3067 ngut dei ki service voters.

U la iathuh ba ha ki artylli ki constituency Lok Sabha kata ka Shillong bad Tura ki don haduh 3167 polling stations kiba kynthup ia ki 704 tylli ki polling station kiba long vulnerable, 249 tylli ki polling station kiba long critical bad 68 tylli kiba long critical bad vulnerable ha kajuh ka por bad 2146 ki long kiba iai beit.

Ki polling stations kiba don hajan khappud Bangladesh ki long 86 tylli bad ha ka khappud Assam pat ki long 171, u la iathuh u Bah Kharkongor.

U la ong ruh ba 20 na ki 60 tylli ki constituensy ki la shah ithuh kum ki expenditure sensitive Constituensy bad katkum ka kyndon aiñ bala pynthymmai ki kyrtong ki dei ban ai ia ka jingioh jingem ne ka income return ha ki san snem bala leit.