Yn wanlam ia ka Sonam bad ki lai ngut sha Shillong ban lap ia jingshisha halor ka kam pyniap

Syllad | The Rising MeghalayaJune 9, 2025

U Symbud Myntri Rangbah ka Jylla u Bah Prestone Tynsong haka sngi Nyngkong u la ong ba ia ka Sonam kaba dei ka kurim jong u Raja Raghuvanshi uba la shah pyniap lem bad laingut kiwei pat kiba la shah kem noh halor kane ka jingjia yn wanlam sha Shillong ban pynlong shuh shuh ia ka jingtohkit khnang ban lap ia ki jingshisha baroh.

U la ong ba ka jingtrei shitom jong ki pulit ka jylla ha ryngkat ka jingiatreilang bad ki bor pulit ki ar jylla la ioh ban kem noh ia laingut ki briew halor kane ka jingjia kam pyniap, kata arngut la kem na Indore (Madhya Pradesh) bad uwei na Lalitpur (Uttar Pradesh), katba ka Sonam ka la leit pyndem da lade ha Nandganj police station ha Ghazipur district ka Uttar Pradesh.

“Kane ka jingioh kem ka la wanrah ka jingkylla kaba khraw bad sei madan ia ki jingjia kiba pynkyllain halor ka jingshah pyniap ba triem jong u Raja bad hadien ka jingjah rngai ka kurim jong u ka Sonam Raghuvanshi”, u la ong haba kren sha ki lad pathai khubor.

U Bah Prestone u la ong ruh ba kane ka jingmih kadei na ka jingpyrshang borbah da ka kynhun tohkit ba kyrpang jong ki pulit ka Meghalaya (SIT) ba la kyrshan lang da ka tnad  State Disaster Response Force (SDRF), National Disaster Response Force (NDRF), ki kynhun wad bniah na ka thain bad ki tnad  bapher bapher ka jylla.

Namar kane ka jingjia u Symbud Myntri Rangbah u la bthah ruh ia baroh kiba buh homestay bad hotel ba kin buh ia ki rekod kiba biang bad ban register ia ki nongwan shangkai sha kane ka jylla.

“Ngam ong ba ngim don ia ka rukom treikam kaba biang ha ka jylla. Ngi don ia kine. Ngam ong ruh ba ki long shispah percent. Ngin nangpynkhlain shuh shuh khamtam ha kito ki jaka kiba donkam ban pynkhlain. Ha ka jingshisha ka la don ka jingbthah na ka tnad Tourism ha kaba iadei bad ka jingdonkam ban register ia kito ki nongwan shangkai,” u la bynrap.

U la ong ruh, “Ha ka jingshisha ngi la don ruh ia ka ain kaba la buh ryntih.Ia ka Tourism Act la dep ban pyntreikam bad lyngba kane ka Act ki lah ban phah ia ki kot ki sla sha ki police station ne sha ki SP kat kaba donkam, kata da kaba pynskhem ia ka jingdonkam jong kiba ki nongiashim bynta kynthup ia ki dorbar shnong ban long ka bynta jong kane ka jingtreikam baroh kawei.”

Nalor kata u la ong ruh, “Ngi kyntu da ka jingburom ia ki lad pathai khubor bad ia ki paidbah ba kin ailad ba ka jingbishar hok kan shim ia la ka jong ka lynti bad ban kiar na kino kino ki khana kiba shu thaw.”

Haba kylli la kia sorkar kan mudui da ka case pynjah burom ne defamation case pyrshah ia kito kiba pynthohbria ia ka jylla, u Bah Prestone u la ong, “Ngin sa peit kumno ban leh namar mynta hi wat ym poi sha kano kano ka jingpynkut namar ka jingtohkit kaba shisha ka dang shu sdang.”  

Watla katta u la pdiang ba ka sorkar ka don ia ka jingktah kaba jur namar ki jingkynthoh lyngba ki rynsan social media bad ki national media kiba shim ia ka Meghalaya kum ka ktem jong ki nongleh kam bymman.

Haba pynpaw ba ka Jylla Meghalaya ka dei kawei na ki jaka kiba shngain tam na ka bynta ki nongwan shangkai hapoh ka ri, u Bah Prestone u la ong, “Ki bor pulit jong ngi ki dei kiwei na kiba tbit hapoh ka ri, nga tharai phi la iohi ia kane bad ngi la pynshisha ia kane bad ym tang ba phi kynmaw ia ki ki 15 snem hadien ba phi la tip ia ki kam lehnoh bd kumno ba ngi la lah ban tehlakam. Ngim donkam ia ki shipai ne ki bor pahara sorkar pdeng hynrei ngi pyniaid hi da lade ia kiei kiei baroh.”