Yn wan pynlynguh u nongrwai Akon ha ka tamasa Cherry Blossom ha Shillong

Syllad | The Rising MeghalayaSeptember 10, 2024

U nongrwai ba pawnam ka pyrthei u Akon ha kaba khatduh un wan sha India ban pynlynguh ha ka Tamasa Cherry Blossom ka ban long ha ka 16 tarik u Naiwieng 2024 ha ka Nongbah Shillong.

Kane ka concert paidbah kaba la ap khmih lynti la slem bha ka dei shibynta jong kane ka tamasa ha kaba yn sakhi ruh ia ka kynhun nongtem ba la rim bha ka Boney M bad ka R3HAB, kata ki ban shim bynta ha la ki jong ki sngi.

Kane ka concert ba la khot pynlong da ka Rockski EMG ha ryngkat ka jingiatreilang bad ka Akon’s company, Konvict Touring, kane ka jingwan iashim bynta ka long shibynta jong ka ‘Superfan Tour’ jong u Akon kaba kynthup kawei ka show ha kawei ka ri ha ka dewbah Asia ha u bnai Naiwieng bad Nohprah, kata nalor kiwei pat ki jaka ki ban kynthup ia haduh kumba phra tylli ki ri.

Ka tamasa Cherry Blossom ka la don ia ka histori halor ka jingkhring ia ki paidbah na kylleng, kata hadien ka jingseisoh lyngba ka jingkhring kaba la khring ia ki briew na ka thain Shatei Lammihngi (Northeast) bad ki bynta jong ka Ri ha ki snem kiba la dep.

Ha u snem ba la dep la sakhi ia ka jingwan iashim bynta jong ki nongtem nongrwai ba pawkhmat kum u Ne-Yo bad u Ronan Keating kiba la khring ia shibun ki paidbah.

Ha kane ka kynti kaba mynta lehse kan long kaba kham kongsan namar kan kynthup ia ka ‘farewell tour’ jong ka kynhun Boney M ha kaba yn sakhi ia ki dkhot kiba seng ia ka kiba kynthup ia ka Maizie Williams ka ban long ka tamasa ka ban ym pynsepei da ki nongkyrshan jong baroh kine ki arkynhu nongrwai.

Ia ki tiket na ka bynta ka Tamasa Cherry Blossom mynta la lah ban ioh lyngba ka BookMyShow.com, bad ka dor kan sdang naduh ka T.3,299 na ka bynta ki riew paidbah bad T. 8,999 na ka bynta ki passVIP.