Yn wan plie u MP Rajya Sabha ia ki jingpynthaba pynkhreh Christmas ka shnong Moolamylliang 

Syllad | The Rising MeghalayaDecember 12, 2023

Ka Dorbar Shnong Moolamylliang, East Jaiñtia Hills District mynta u snem ruh kan bteng ban pynphyrnai ia ka shnong ka thaw lyngba ki jingthaba shibynta jong ka jingpynkhreh ia ka Khristmas ha kaba yn ia don lang ruh u MP ka Rajya Sabha, u Dr. WR Kharlukhi kum u Kongsan u ban plie ia kine ki jingpynthaba ha ka 18 tarik une u bnai ha ryngkat ka jingiadon lang ka MLA ka Sutnga Saipung ka kong Santa Mary Shylla kum ka Symbud Kongsan.

Kane ka jingpynthaba da ki light kan sdang naduh katei ka sngi 18 tarik man la ka miet, kata naduh ka por 5 baje janmiet haduh ka por 12 baje shiteng synia bad yn pynkut ia kane ka tamasa pynthaba ding ha ka 3 tarik u Kyllalyngkot 2024.

Halor kane ka  Dorbar Shnong ka pynbna ruh ba kan don ka Christmas concert ha ka janmiet jong ka 22 tarik Nohprah ha kaba ka kynhun tem “Taken Aback” kaba na Mawngap, East Khasi Hills District bad ka  kynhun “The Lynx” kaba na sor Jowai kin wan ban pynsawa ia ki sur jingrwai Christmas.

Katba ha ka janmiet jong ka 23 tarik Nohprah, ka kynhun tem jong u Bah Eladmitre Dkhar bad u DJ Wanshan, kin pynsawa ia ki sur jingtem ha kane ka shnong.

Lah ban kdew ba ka shnong Moolamylliang, East Jaintia Hills ka jngai 112 Km na ka nongbah Shillong bad 15 KM na ka District headquarter, Khliehriat.

Ha kaba iadei bad kane ka Dorbar Shnong ka la pynkhreh ruh ia ki jaka sahmiet na ka bynta kito kiba kwah ban sahmiet, kata ha Guest House, Khliehriat, ha kaba kiba don jingthmu ki lah ban phone sha kine ki nombor: 9366455744, East Side Inn-9089390888, Mon Maya Guest House-8132002479 bad ha Wika Guest House-6009538618.

Na ka bynta kito kiba wan thymmai ha kane ka shnong ki lah ban pyndonkam da ka google map “Moolamylliang Presbyterian Church” lane ban scan ïa u OR Code.

Shuh shuh na ka bynta kito kiba wan ha ka por mynsngi, ka don ki dukan ba die jingbam hajan shnong ba la pynkhreh da ka Tista Hotel Khliehriat.