Yn wan plie ka Myntri pla tyngka ka Sorkar Pdeng ia ka Polo Shopping Complex 

Syllad | The Rising MeghalayaJuly 10, 2025

Ka Myntri Pla tyngka ka Sorkar Pdeng ka Nirmala Sitharaman kan pynlong ka jingwan jngoh kaba saw sngi sha kane ka Jylla Meghalaya naduh mynta ka 10 tarik haduh ka 13 tarik Naitung 2025.

Ka Myntri kan iashim bynta ruh ha ka jingplie paidbah ia ka Polo Shopping Complex ba la bei tyngka da ka SMART City Mission mynta ka 10 tarik Naitung bad yn bud da ka jingiakren hapoh ka Project Monitoring Information System (PMIS) ha Shillong.

Ha ka 11 tarik Naitung kane ka Myntri kan leit ban plie ia ka Northeast Conclave bad buh ia u mawnongrim na ka bynta ka jingtei ia ka Indian Institute of Corporate Affairs (IICA) campus ha Indian Institute of Management Shillong ha kaba u Myntri Rangbah ka Jylla u Conrad K Sangma un ia don lang kum u Symbud Kongsan.

Ka Sitharaman kan leit jurip ruh ia ka Shillong Tech Park ha Umsawli bad kan plie ruh ia ka jingpyni nam kiba pyni ia ki nongrep bad ki nongseng kam la jong hapoh Lariti International Centre, Shillong.

Nalor kata ka Myntri kan iashim bynta ruh ha ka jingialang bad ki nongshim bynta ha ki kam karkhana ha Courtyard Marriott, Shillong ha ka 12 tarik Naitung. Ha kane ka sngi kan don ruh ka jingiakren bad ki kynhun Self Help Group jong ki kynthi, ki Seng nongrep ha ka shnong Laitkynsew nalor kiwei.

Kumjuh kan pynlong ruh ka jingiakren bad ki nongioh jingmyntoi lyngba ka Payment for Ecosystem Services Program ha ka shnong Siej bad pynkut ia ka prokram paidbah ha ka shnong Sohbar bad ha ka 13 tarik kaba dei ka sngi kaba khatduh kan leit jngoh ia ka skul Ram Krishna ha Sohra.