Yn wan ka Nora Fatehi ha ka Cherry Blossom Festival, iohnong T.133 klur na ka tamasa ba la dep: Paul

Syllad | The Rising MeghalayaSeptember 3, 2025

Ka jingbei tyngka jong ka sorkar Meghalaya lyngba ka jingpynlong ia ki tamasa ka la pynlong ia ka jylla ba kan ioh nong haduh T.133.43 klur ha u snem ba la dep.

Ia kane la pyntip da u Myntri ka Tnad Tourism u Bah Paul Lyngdoh ha ka jingpyllait paidbah ia ka Meghalaya’s Autumn Calendar 2025 kaba thmu ban kyntiew ia ka kam jngohkai pyrthei ha ka 2 tarik Nailur.

“Ka jylla ka la bei tyngka T.23.50 klur na ka bynta ki tamasa bapher bapher ha u snem ba la dep kynthup ia ka Me-gong Festival, Shillong Cherry Blossom Festival, bad ka Literary Festival nalor kiwei kiwei. Ka jingioh nong na kane ka jingbei tyngka ka long haduh T.133.42 klur,” ong u Bah Paul haba kren sha ki lad pathai khubor.

U la pyntip ba ka Shillong Cherry Blossom Festival ka ban pynlong ha ka 14 bad 15 tarik Naiwieng mynta u snem bad kane ka tamasa ka la pynioh kamai shibun ha u snem ba la dep, ha kaba ka sorkar jylla ka la bei T.5 klur bad ka la ioh nong haduh T.59.98 klur. Katkum ka jingong ka jong u ka jingbei tyngka mynta u snem kan kot sha ka T.4 klur.

“Ha kane ka kynti kaba mynta ia ka Shillong Cherry Blossom Festival yn pynlong ha JN Stadium, Shillong khnang ban ailad ia ki briew kiba wan na shabar sha kane ka tamasa ba kin ioh mad ia ka jinglong kaba pher ha kaba kin ioh ban iai kjat ha kylleng ki jaka jong ka nongbah ban leit sha ka surok kaban lam sha madan Polo ban iashim bynta ha kane ka tamasa kaba ar sngi kynthih. Nalor kata kin don ruh ki dukan bad ki jingpyni nam bapher bapher ha ki lynti iaid ban poi shapoh stadium,” pynpaw u Myntri.

“Ha kane ka Tamasa yn wan iashim bynta da ki nongrwai bad kynhun tem ba pawnam ha ka sngi ba nyngkong jong ka tamasa ka ban kynthup ia u Jason Derulo, ka kynhun The Script bad ka Nora Fatehi kaba pawkhmat bad kaba la pynshongshit paidbah kum ha ka lympung FIFA World Cup kaba la long ha Qatar ha u snem 2022, bad kan dei ruh ka sien kaba nyngkong eh ia ka ban wan iashim bynta ha ka tamasa ka ban long hapoh ka ri India,” bynrap u Bah Paul.

Kiwei pat ki tamasa katkum ka calander ba la pynbna da u Myntri ka kynthup ia ka Meghalaya Kayak Festival ka ban long naduh ka 14-18 tarik Risaw, ka 7th Ahor 4×4 Offroad Challenge 23-25 tarik u Risaw, ka Shillong Literary Festival 20-22 u Naiwieng, ka Me-gong Festival ha ka 28-29 tarik u Naiwieng bad ka Winter Tales ha ka 11-13 tarik u Nohprah.

Nalor kata u Myntri u pyntip ruh halor ka jingpyrshang jong ka sorkar ban kyntiew ia ki sap ki phong jong ki trai jylla lyngba ka CMJMP programme kaba long man la ka sngi kaba kynthup haduh 7000 ngut ki nongtem nongrwai.

“Kiba bun na ki kynhun nongtem ka jylla kiba la leit ban iashim bynta shabar ka jylla mynta ki la wan ban pyni ia la ki jong ki sap ki phong ha Meghalaya bad wat sha kiwei pat ki ri. Kin don katto katne ki nongtem nongrwai ki ban leit iashim bynta sha Singapore ha u bnai u ban wan,” u la ong.

U Myntri u pyntip ruh ba ka sorkar ka dang bteng ban pynleit jingmut ha ka ban kyntiew ia ki jingtei kiba iadei bad ki kam jngohkai, kaba kynthup ka jingpyniasoh ia ki shnong lyngba ki Tourism Circuit.

U la ong ruh ba ka Tourism policy ka don ia ka thong ban kyntiew ia kane ka kam ha ki bynta bapher bapher. Ka jingbei tyngka na ka bynta ka 5 Star ha Umiam bad Sohra la khmih lynti ba kan khring ia ki nongwan jngohkai kiba don ba em bad ka ban kyntiew shibun ia ka ioh ka kot jong ka jylla.

“Hapoh ki lai snem ki ban wan, ngi dei ban lah ban iohi ba kine ki jingbei tyngka kiba kongsan ha ka ban pynbiang ia ki jaka sah. Mynta ngin sa don sa artylli ki 5 Star ha Umiam bad 2 tylli ha Sohra. Ngin don ruh ia ka Rain Museum ka ban tei ha Mawsynram bad ka Mawmluh experiential cave, kine baroh kin khring shuh shuh ia ki nongwan shangkai pyrthei kiba wan sha Meghalaya,” u la ong.

Katkum ka jingong ka jong u ka Sohra ka don haduh palat 500 tylli ki homestay bad kane ka la aijingmyntoi shibun ia kiba bun ki longiing longsem.