Yn wan iashim bynta ki rang ia kura ba pawkhmat ka ri ha ka “National Boxing Championships 2023” ha Shillong

Syllad | The Rising MeghalayaNovember 10, 2023

Kato katne ngut ki rang ne ki snar ia kura ba la bna nam jong ka ri kin wan ban iashimbynta ha ka rynsan ia kura ba la tip ia ka kum ka “7th Elite Men National Boxing Championships 2023”, kaba la buh ban long  ha kane ka nongbah Shillong naduh ka 25 tarik mynta u Naiwieng haduh ka 1 tarik u Nohprah u ban wan.

Ia kane ka jingiakob yn pynlong ha SAI Multipurpose Indoor Hall, Shillong ha kaba yn pynlong da ka da ka Meghalaya Boxing Association (MBA) ia kaba la ithuh da ka Boxing Federation of India (BFI) bad ia kaba la iarap bei pisa da ka tnat Direcftorate of Sports & Youth Affairs ka sorkar jylla.

Ha kaba iadei bad kane, na ka liang ki nongialam ka Meghalaya Boxing Association hapoh ka jingialam ka jong u bah Bah Cornelius Kharhunai, President MBA, Bah Larry Kharpran, Joint Secretary BFI  bad  uba dei artad u Organising Secretary ka “7th Elite Men National Boxing Championships 2023”, Bah Khrawkupar Kharmawphlang Joint Secretary MBA, Bah Dondor Marwein Secretary MBA, Bah Daniel W Marbaniang Treasurer MBA, ki la wan  ban iakynduh ia ki lad pathai khubor kum shibynta ban pynbna iar sha ki padbah ka jylla ha kaba iadei bad ka jingpynlong ia kane ka jingiakob.                                

Na ka liang u bah Larry Kharpran u iathuh ba la khmih lynti ba kin don kumba 27 haduh 28 tylli ki jylla bad ki kato katne ki Synjuk ialehkai ki ban sei madan ia la ki rang ia kura ban wan ban aireng sha kane ka jingiakob.

U Bah Kharpran u la ong ruh ba ki kyrdan jingkhia ne ki weight category ki ban pynlong ha kane ka jingiakob kin long baroh haduh 13 tylli, bad ki kato katne ki snar ia kura ki ban wan ban airing ki kynthup ia u Amit Phangal, u Dipak bad na kane ka jylla ruh u bah Larry u kam ba ki don ki kato katne ki rang ia kura kiba  kynsai ki ban kiew rynsan ban aireng ha kane ka jingiakob.