Yn tynjuh ka HNLC ia ka rai ka Sorkar Pdeng ba pynjlan iaka jingkhein beain sa san snem

Syllad | The Rising MeghalayaMarch 20, 2025

Ka Seng Hynniewtrep National Liberation Council (HNLC) ka la rai ban tynjuh pyrshah ia ka rai jong ka Sorkar Pdeng ban pynjlan ia ka jingkhein beain pyrshah ia ka seng na ka bynta san snem.

Haba pyntip ia kane ha ka 19 tarik Lber, u nongmihkhmat na ka bynta ka HNLC uba dei ruh u President ka Seng Hynniewtrep National Youth Front (HNYF) u Bah Sadon K Blah u la ong ba ka seng (HNLC) ka la thung ia u nongiasaid ain u ban iasaid ia ka mukotduma jong ka ban tynjuh halor katei ka rai jong ka Sorkar Pdeng ban pynjlan ia ka jingkhein beain hapoh jong ka ain Unlawful Activities Prevention Act (UAPA) Tribunal ha ka jingshong bishar ka ban long ha Shillong ha ka 22 tarik Lber.

Na ka liang ka HNLC ka la thung ia u Bah Fernando Shangpliang kum u nongiasaid ain naka bynta jong ka ha ka 6 tarik Lber. 

Lah ban kdew hangne ba ka Ministry of Home Affairs ka la pynmih ia ka jingpynbna ha ka 14 tarik Naiwieng 2024 ha kaba la pynbna ia ka HNLC ha ryngkat baroh ki tnad treikam jong ka kum ki seng lehnoh na ka bynta san snem.

Haba kylli, u Bah Sadon Blah u la ong, “Ka daw kaba pynlong ia ka HNLC ba ka kwah ban ia tynjuh ia kane ka kam da ka lynti jong ka ain ka long namar ba hapdeng jong ka jingia bunkam bha na ka bynta ka jingiakren iasuk ha ka por ba ki nongialam ka HNLC ki la don ha Shillong, ngi la buh hakhmat ha kiba bun ki khep ha ki jingialang ba ka sorkar ka dei ban weng noh ia ka jingkhein beain ia ka HNLC hashwa ba ka seng kan wan shakhmat na ka bynta ka jingiakren iasuk. Hynrei, la iohi ba ka rynsan sain hima kaba ka HNLC ka la pyrshang ban ioh ka la pulom noh namar ka sorkar jylla lane ka sorkar pdeng kim shym la pynpaw shai ba kin weng noh ia ka jingpynbna ia ka HNLC kum ka seng kaba la shah khein beain. Mynta ka la shu paw bad sngewthuh ba ka HNLC ka shimkhia shisha ha kaba iadei bad ka lynti wad jingsuk bad dei na kata ka daw ka la pyrshang ban tynjuh ia kane ka jingpynjlan ban khein beain pyrshah ia ka seng da kaba shim ia ka sienjam lyngba ka iingkashari.”

“Nga kyrmen ba ki iingkashari, ka sorkar jylla bad sorkar pdeng kin sngewthuh ba ka HNLC ka dang shimkhia bha ha kaban wan shakhmat ha ka jingiakren iasuk. Kala pulom ha ka rynsan sain hima bad mynta ka seng kala shim ia ka rynsan jong ka iingkashari bad kyrmen ba kiei kiei kin iaid ha ka lynti kaba dei” ula bynrap.