Yn tohkit ka SIT 6 sngi ia ki 3 ngut kiba pynjulor ia ki sakhi satar halor ka jingiap u Raja Raghuvanshi

Syllad | The Rising MeghalayaJune 27, 2025

Ka iingkashari u Chief Judicial Magistrate haka sngi Palei ka la ai bor ia ka kynhun Special Investigation Team (SIT) ka Jylla ba kan pynlong ia ka jingtohkit kaba hynriew sngi pyrshah ia ki laingut ki briew kiba pynjulor ia ki sakhi satar kiba don jingiadei bad ka jingjia shah pyniap u nongkhaii na Indore u Raja Raghuvanshi ha ka thain Sohra.

U Superintendent of Police (City) u Herbert Kharkongor uba khlieh ia ka kynhun Special Investigation Team (SIT), u la ong ba ia kine ki lai ngut ki briew la wanlam na Madhya Pradesh sha Shillong haka sngi Palei, hadien la ialam ia ki hakhmat ka iingkashari.

Kine ki laingut kiba la shah kynnoh donkti ki kynthup ia u Lokendra Singh Tomar uba shong ba sah ha Gwalior, Madhya Pradesh uba dei ruh u trai jong ka iing (flat) ha Dewas Naka ha kaba ka Sonam Raghuvanshi kaba la shah kynnoh donkti hakhmat eh ha katei ka kam pyniap ka shong ka sah ha ka por ba ka dang phetrieh sha Indore. Ia u Tomar la kem noh ha ka sngi Nyngkong ba la lah namar ka jingdonkti ha kaba pynjulor noh ia ki sakhi satar kiba kongsan halor katei ka jingjia.

Ki arngut kiwei pat kiba la shah kynnoh donkti ki kynthup ia u Silome James uba dei u nongdie iing bad jaka uba la wai ia kawei ka flat na ka bynta u Vishal Singh Chauhan uwei napdeng kiba shah kynnoh donkti hakhmat eh ha katei ka jingjia kam pyniap, bad uwei pat u Balia Ahirwar uba dei u nongap pahara hapoh ka complex kaba kane ka flat kadon. Ia kine la ioh ban kem noh ha ka sngi U Blei ba la lah namar ka jingdonkti ha kaba pynduh pyndam ia ki sakhi satar.

U SP u la ong ba kine ki briew ki la pynjulor noh ia ki sakhi satar kiba kongsan, kaba kynthup ia ka pla kaba don ia ka laptop lem bad kiwei pat ki tiar ki tar ha kaba ki la thang noh ruh ia kane ka pla. Mynta ki pulit ki dang pyrshang ban ioh lum ia kine ki tiar ki tar kiba la julor bad ban bteng ia ka jingtohkit.

Nalor kata u Bah Herbert u la ong ruh ba ka kynhun SIT ka la ioh ruh ban kurup ia kawei ka pistol khlem laisen na kine ki briew kiba la shah kynnoh donkti, bad ki pulit ki dang bishar bniah la ia kane ka pistol la pyndonkam ne em ha katei ka kam pyniap lane ka dei ka bynta jong kawei pat ka plan kaba kham heh.