Yn shah pynkup burom ka Bijoya Sawian ka nongthoh kot bad pynneh kolshor ha New Delhi

Syllad | The Rising MeghalayaJuly 13, 2025

Ka nongthoh kot, ka nongpynkylla ktien bad kaba trei na ka bynta ban pynneh pynsah ia ka Kolshor, ka Kong Bijoya Sawian kan shah pynkup burom ha ka 3rd Edition jong ka Aalekh Foundation Women Achievers’ Awards, ka ban long ha ka 19 tarik Naitung ha The Leela Palace, New Delhi.

Ka Bijoya ka dei napdeng ki 20 ngut ki kynthei kiba kyrpang kiba la shah jied na kylleng ka ri halor ka bynta kaba ki la shim ban wanrah ka jingkylla bad ka jingktah ha ki bynta jong ki jingtrei bapher bapher.

Kane ka khusnam ka aijingithuh ia ka Kong Bijoya halor ka jingnoh synniang sha ka thoh ka tar jong ka ri India bad ka jingpynneh pynsah ia ka kolshor tynrai khamtam lyngba ki jingiathuh khana kiba bniah bad ka jingiadei kaba jylliew bad ka pateng jong ka jaidbynriew Khasi.

Ki jingpynkylla jong ka kiba la ioh ia k jingiaroh kum ‘The Teachings of Elders and The Main Ceremonies of the Khasis’ ki la pynneh pynsah ia ki jingthoh kiba hiar pateng, katba ki jingthoh ba mutdur jng ka kum ka ‘Shadow Men and Hill Songs of Love bad Longing’  ka pynmih ia ki kyntien jingrwai bad pynpaw ia ka jinglong jingim hapoh Rilum Khasi.

La ai ruh ki jingiaroh ia ki jingthoh ki jong ka namar ka jingpyniasoh ia ki jaka bad ki pateng, kaba wanrah ia ka histori ba riewspah jong ka kolshor bad ka imlang sahlang jong ka thain Shatei Lammihngi sha ka thoh ka tar jong ka ri.

Ha kane ka jingialang pynkup burom yn ia don lang ruh ki riew pawkhmat kiba kynthup ia u R. Venkataramani, Attorney General of India bad u Justice Sanjay Kishan Kaul Nongbishar barim ka Iingbishar Supreme Court ka India kum ki Kongsan.

Ka Dr. Rennie Joy kaba dei ka Nongseng jong ka Aalekh Foundation haba ai jingkren shwa shwa jong katei ka jingialang ka la ong, “Ki jingtrei jong ka Bijoya Sawian ka dei kaba wanrah jingkylla ha ka liang ka thoh ka tar -kaba pynphai biang ia ka burom, ka sur bad ka jingiohi ia ki khana kiba la jah bad ym iohsngew shuh. Ha Aalekh, ngi sngew sarong ban pynkup burom ia ki kynthei kiba kum ma ka kiba pynwan dur ia ki jingiathuh khana, pynroi ia ki pateng bad pynkynmaw ia ngi ia ka bor jong ki kyntien ban pynneh pynsah bad ban wanrah jingkylla.”

Ka Aalekh Foundation Women Achievers’ Awards ka dei ka sienjam ba kongsan kaba pyndon burom ia ki kynthei kiba la ioh ia ka jingjop ym tang ha la ki jong ki jingtrei jingktah hynrei kiba noh ruh ia u synniang ba kongsan sha ka imlang sahlang, ka kolshor kaba tei ia ka ri bad ka jaidbynriew.