Yn shah ktah ki Bank ha ka Jylla na ka jingiakhih ba ar sngi ba la khot pynlong da ka UFBU

Syllad | The Rising MeghalayaMarch 18, 2025

Ha ryngkat ba ka ri baroh kawei, ka Meghalaya State Unit jong ka Union Forum of Bank Unions (UFBU) kan iashim bynta ha ka jingiakhih ba ar sngi ka ban sdang naduh ka shiteng synia jong ka 23 haduh ka 25 tarik Lber halor ka jingbym lah ban pynurlong ia ki jingdawa kaba la sahteng la slem da ki bor ba dei khmih.

Ka jingtreikam jong baroh ki bank sorkar kum ka Central Bank of India, State Bank of India, Canara Bank of India, Punjab National Bank of India, Union Bank of India, Indian Overseas Bank, Bank of India nalor kiwei pat kin shah ktah ha kine ki ar sngi jong ka jingiakhih.

Ka United Forum Bank of India kaba dei ka kynhun jong ki khyndai tylli ki bank kiba kongsan jong ka ri ka la pynbna ia kane ka jingiakhih hadien ba kam shym la lah ban poi sha ka jingiamynjur bad ka Indian Banks Association (IBA).

Haba pyntip sha ki lad pathai khubor halor kane ka rai jong ka Meghalaya State Unit ban iashim bynta ha kane ka jingiakhih jong ki Bank, u Dy General Secretary u Devadeep Dasgupta u la ong ba ka jingdawa ka jong ki ka kynthup halor ka jingpynrung kam kaba biang, ka jingpynskhem ia ki nongtrei ba shipor bad ka jingtrei ba san sngi ha ka shitaiew ha ki bank.

U la pyntip ruh ba ka UFBU ka la khot ban weng noh ia ka jingbthah ba dang shen jong ka sorkar halor ka jingbishar bniah ia ka jingtreikam bad ka PLI, ia kaba u la ong ka buh jingma ia ka kam ka jam, ka jingpynmih ia ka jingiapher bad kaba pynkhein ia ka jingiateh kular.

Nalor kata u Dy General Secretary u kyntu ruh ia ka sorkar ba kan pynkylla ia ka Gratuity Act ban kyntiew ia ka jingsiew (ceiling) sha ka T.25 lak bad ban pyllait na ka jingsiew khajna kumjuh ban pynneh ia ka equity kaba ym duna ia ka 51% ha ka IDBI Bank. U la kynthoh ruh ia ka rukom pyniaid ia ki micro-management of Public Sector Banks (PSBs) da ka Department of Financial Services (DFS).

U Dasgupta u la ban jur ruh ba ki bank ki donkam ia ka jingdon nongtrei kaba bang khnang ban lah ban pyndap ia ka jingdawa jong ki paidbah, da kaba kdew ia ka jingduna namar ka jingbym biang ka jingpynrung kam naduh kine ki shiphew snem ba la dep. U la kdew ruh ba katba ki PSBs ki pyntreikam ia ki skhim sorkar, hynrei ki duna pat ha ka jingdon ia ki nongtrei. Ki jingkhein ba thikna ki pyni ia ka jingduna kaba jur ha ka jingdon ki nongtrei ha ki PSBs kata kaba la duna da haduh 1,51,835 ngut ki nongtrei ha ka kyrdan clerk bad 59,280 sub-staff ha kine ki 11 snem kiba la dep.Haba ia nujor bad ki bank shimet la sakhi halor ka jingkiw ha kaba iadei bad ka jingbiang jong ki nongtrei.