Yn shah ktah ka nongbah Shillong ba sangeh pynpoi petrol ka NEPMU namar ka ‘No Entry’

Syllad | The Rising MeghalayaJune 9, 2024

Ka nongbah Shillong ka lah ban sakhi ia ka jingduna petrol hadien ba ka seng jong ki kali ki umphniang petrol hapoh ka lama jong ka North East Petroleum Mazdoor Union (NEPMU) ki la sangeh ban kit bad pynhiar ia ki tanker kit umphniang na Guwahati sha Shillong naduh ka 8 tarik mynta u bnai.

Ka daw halor kane ka jingiakhih ka long namar ka jingkhang rung kali ba la pynjari da ka Tnat pulit ka East Khasi Hills District ha kaba iadei bad ka leit ka wan jong ki Tanker kit umphniang ha Lad Smit naduh ka por 1 baje mynsngi haduh 5 baje janmiet naduh ka taiew ba nyngkong jong u bnai Iaiong mynta u snem.

“Ia ka jingwan rung jong ki tanker ym lah satia ban pyrkhing ne khang namar la shim ia ki kum ki mar kiba kongsan. Ngi la phah da ka shithi sha u Deputy Commissioner ka East Khasi Hills District ha ka 9 tarik u bnai Iaiong ba ladep ban kyntu ban weng noh ia kane ka jingpyrkhing ia ka jingwan rung jong ki tanker kit umphniang sha Shillong, hynrei um pat shym la ai satia ia ka jubab kaba biang,” ong u General Secretary ka NEPMU u Rama Das lyngba ka lad pathai khubor.

“Hynne ka sngi ngi la iakren bad u DC. U la ong ha ngi ba un iakren ia kane ka kam bad u SP bad ong ruh ba naduh mynta kin ym khang shuh ia ka jingwan rung ki tanker kit ummphniang. Hynrei ngim pat shym la ioh ia ka hukum halor kane,” ong u Das.

“Lada ngi la ioh pdiang ia ka hukum na ki bor sorkar, ngin weng noh ia kane ka jingiakhih,” ong u Das.

Ki don haduh palat 30 tylli ki tanker kit umphniang bad kumba 15 kiba kit LPG Cylinder kiba mih na IOCL Depot ha Betkuchi, Guwahati sha Shillong man ka sngi.

Ki tyllong khubor ki iathuh ba kan ym don satia ka jingpynkit ne pynhiar ia ki tanker umphniang ha ka 8 bad 9 tarik mynta u bnai. Kumta ruh kane ka lah ban wanrah ia ka jingduna petrol ha ka nongbah Shillong naduh ka 10 tarik sngi Nyngkong.

Ha ka shithi sha u Deputy Commissioner ka East Khasi Hills District, ha ka 30 tarik u Jymmang ba ladep, ka NEPMU ka la ong, “Ngi la phah shaphi ia ka shithi ban weng ia ka ‘no entry’ ha Shillong ha ka 8 tarik u Iaiong ba ladep, hynrei kam shym la don kano kano ka jingshim kam na ka liang ki bor pyniaid district. Ia kane ka ‘no entry’ la pynjari ha Lad Smit naduh ka por 1baje mynsgi haduh 5 baje janmiet pyrshah ia ki tanker kit umphniang bad kiba kit gas kumjuh ia ki trok. Kham hashwa la pynjari ia kane ha Alugodam naduh ka por 2 baje mynsngi haduh 4 baje janmiet.”