Yn sdang noh ia ka ‘Inter District Youth League’ ka MFA

Syllad | The Rising MeghalayaJune 9, 2024

Ka jingialang jong ka Meghalaya Football Association (MFA) kaba la long ha ka 8 tarik Jylliew ha conference room ka SSA Stadium, Polo, ka pyntip ba ka lympung ialehkai “Inter Distrct Meghalaya Youth League,” la la rai ban sdang noh naduh ka 20 tarik u bnai Naitung u ban wan. 

Ia kane la pynpaw da u Secretary bad u Vice President ka MFA u Bah Sunesh Syiem bad Bah Cliff R Nongrum haba kren sha ki lad pathai khubor hadien ba la wai kane ka jingialang.

U Bah Sunesh bad Bah Cliff ki pyntip ruh ba ha kane ka jingialang ka Executive Committee la shim ruh ia ka rai na ka bynta ka jingpynkhreh ban pynlong ia ka “Meghalaya State League” bad kumjuh ia ka “Women’s League.”

Ha kaba iadei bad ka State League, u bah Sunesh u la ong ba la buh ha ka jingmut  ba lada lah ban ioh lei lei sa ka mang pisa, ia kane ka lympung ruh lah ban pynlong ha u bnai Naitung u ban wan, kata kaba mut tang na ka bynta ki qualifiers ki ban pyndap ia ki jaka kiba lait bad ia ka lympung kaba pura pat yn sa lah ban pynlong ha u bnai Nailar uba bud.

Katba ia ka women’s league, yn pynlong kumba la leh ia ka youth league ha kaba ki kynhun ban iashim bynta kin dei lyngba ki district association, kaba lah ban shim por bad ban pynlong shaduh ki bnai ba 10 ne ba khatwei jong u snem.