Yn sakhi ki paidbah ka Mawkynrew ia ka jingialehkai phutbol ba heh tam ba la tip kum ka 4th Mawkynrew Cup 2023

Syllad | The Rising MeghalayaOctober 25, 2023

Sa shisien pat u paidbah  nongshong shnong ka Mawkynrew kin sa ioh ban sakhi biang ia kawei na ka lympung ialehkai phutbol kaba la bna nam bad ba heh bha ha ka thain ia kaba la tip kum ka ‘4th Mawkynrew Cup 2023’ ka ban sdang naduh ka ka 27 tarik Risaw.

Ki nongkitkam ka Mawkynrew Cup Committee hapoh ka jingialam ka jong u Lakmenlang Wankhar uba long u Convenor jong kane ka lympung bad synranlang da arngut ki dkhot jong kane ka komiti katta u bah Shrenlinus Khriam bad u bah Arland Pyngrope kila iakynduh iaki nongthoh khubor ha Shillong haka sngi ba Ar.

Kum ban shu pynkynmaw ba ha ka samoi ialehkai kaba la dep jong kane ka lympung, na ka liang ki shynrang ka kynhun kaba la ioh ba kan rah ia ka nam kum ka lahduh dei ka Laitkyrhong bad kaba wan ba-ar dei ka Mawkynrew, bad na ka liang ki kynthei, ka lahduh dei ka kynhun ialehkai ka Syniasya.

Haba phai pat sha kane ka samoi ialehkai kaba mynta, ka jingialehkai sdang jong kane ka lympung kan long hadpeng ka Jongksha pyrshah ia ka  Khapmaw ka ban sdang ha ka por 2 baje nohphai sngi, hynrei shwa ia kane ka jingialehkai sdang na ka liang ki bor pyniaid ki la pynbeit ba kan don shwa da ka prokram plie pyrda ka ban sdang naduh ka por 11 baje mynstep, ha madan ialehkai ha Jongksha.

Mynta ka kynti ka song pisa ia ki shynrang kiba ioh ban rah ia ka nam lahduh kan long 2 lak tyngka  bad kaba wan ba-ar pat shi lak tyngka, katba na ka liang ki kynthei pat ka kynhun kaba ioh rah ia ka nam lahduh kan khur ia ka song pisa kaba long 30 hajar tyngka bad kaba wan ba-ar 20 hajar tyngka.

U kongsan u ban ia don bynta ha ka sngi plie pyrda ia kane ka lympung ialehkai un long u MLA ka thain u bah Banteidor Lyngdoh.

Nalor katta kane ka lympung ka dei ruh kaba la ithuh ia ka da ka Meghalaya Football Association (MFA) bad kaba ju ioh ruh ia ka jingiarap bad kyrshan pisa na ka  sorkar.