Yn rakhe ka APSTA ia ka lyngkhuh sngi iap ba 174 snem u Thomas Jones I

Syllad | The Rising MeghalayaSeptember 11, 2023

Ka All Primary School Teachers’ Association (APSTA) mynta u snem ruh kan bteng ban rakhe ia ka lyngkhuh sngi iap kaba 174 snem jong u Rev (L) Thomas Jones I, ia uba la tip bha ruh kum u kpa jong ki dak thoh Khasi ne Khasi Alphabet ha ka 16 tarik mynta u bnai ha Umkor Urksew Stadium Pynursla naduh ka por 10 baje mynstep.

Ha kane ka sngi yn ia don lang ruh u Bah Prestone Tynsong, Symbud Myntri Rangbah ka jylla kum u Kongsan, bad u Rakkam A Sangma Myntri ka tnat pule puthi ka jylla kum u Symbud Kongsan.

Ka Seng ha u kyrwoh lyngba u Bah FC Shullai, General Secretary lyngba une u kyrwoh ka pyntip ruh ba kane ka jingrakhe kan iaid ryngkat bad ka jingdap 181 snem ka jingsdang ia ki skul Primary hapoh ka United Khasi bad Jaintia Hills.

Ha kane ka sngi kumba la ju leh naduh ka snem 1992 ter ter, ka APSTA kan noh synniang ruh ia ka pisa kaba long mar T.50,000 sha ka Christmas Make Over 2023 jong ka Ri Khasi Channel kumjuh sha ka Pynursla Parish bad sha ka NEIMA Pynursla.

Kumta na ka liang ka Seng ka kyrpad ia baroh ki dkhot na baroh ki unit jong ka Association ba kin pyllait khnang khnang ia ka por ka jong ki ban ia don ryngkat lang ha katei ka jingrakhe.