Yn rah iakren u Dy CM bad ka committee na Assam ban pynbeit halor ka jingiakynad ha Lapangap

Syllad | The Rising MeghalayaJuly 10, 2025

U Symbud Myntri Rangbah ka Jylla uba dei ruh u Chairman ka Regional Committee ka West Jaintia Hills, u Bah Sniawbhalang Dhar ula pyntip ba shen un rah ban iakren bad u Chairman ka Assam Regional Committee ban ia pynbeit halor ka jingiakynad ba dang shen ha ka shnong Lapangap kaba hap hapoh ka jaka iakajia ha Khanduli-Psiar sector katba kine ki ar jylla ki dang wad ia ki lad ki lynti ban pynkut noh shisyndon ia ka kam iakajia pud.

“Ngan sa iakren bad u Chairman ka Regional Committee na Assam bad ngin sa shim ia ka rai ban pynthikna ban pynneh ia ka shongsuk shongshngain katba ngi dang ap ia ka jingiapynbeit kaba neh hapdeng kine ki ar jylla,” ong u Bah Sniawbhalang haba kren sha ki lad pathai khubor haka sngi Balang.

Haba pynpaw ba ka jingiakren pynbeit pud ha ka wat kaba ar ka dang iaid shakhmat, u Dy CM u la ong katba ym pat lah ban pynbeit ia kane ka kam iakajia pud ka jingiakynad ha kane ka thain kan ym kut satia.  “Lada ki (Assam Regional Committee) ki long kiba la pynkhreh ngin sa pynlong ia ka jingiakren ha kano kano ka por,” u la bynrap.

Katkum ka jingong ka jong u, ka Khanduli-Psiar bad ka Block I ki dei napdeng ki hynriew tylli ki jaka kiba don ha ka jingiakajia ia kiba yn dang ia pynbeit, bad u la kular ruh ba ka sorkar ka la shimkhia bha ban na ka bynta ban ia pynbeit noh ia kane ka kam iakajia pud.Watla katta kan shim kumba katto katne por namar ka dei ka mat kaba la sahteng la slem bah.

Haba kylli, u Dy CM u la ong ba na ka liang u Deputy Commissioner ka West Jaintia Hills u la dep ban aiti ia ka kaiphod sha ka Regional Committee, bad ia kane ka kaiphod jong ka Regional Committee yn sa aiti sha ka sorkar jylla hadien ba ngi la shong jingialang na baroh arliang.”

U Bah Sniawbhalang u la pynlong ka jingleit jngoh sha Lapangap kaba hap ruh hapoh ka Nartiang Constituency kaba u mihkhmat ban bishar bniah ia ka jinglong jingman bad kular ia ki nongshong shnong ba na ka liang ka sorkar kan sa phah kham bun ki bor pulit na ka bynta ka jingshngain bad ban pynneh ia ka suk ka sain.

“Ngi kwah ba kim dei ban don shuh kino kino ki jingjia. Kumba ka long mynta ka jinglong jingman ha kane ka thain ka la jai jai,” u la ong da kaba bynrap ba lyngba ka jingkyrpad jong ki nongshong shnong, na ka liang ka sorkar ka la phah shuh shuh kham bun ki bor pulit ban pynthikna ia ka jingshngain hapdeng ki nongshong shnong.”

“Katto katne na ki briew jong ngi kim nud shuh ban leit sha la ki jong ki pynthor kba.Ngi la bthah ia u Deputy Commissioner ba un khot ia ka jingialang bad ki nongshong shnong na ka bynta ban pynbeit mardor ia kane ka kam. Kim dei satia ban shah pyndik haba ki leit sha ki jingtrei jingktah kiba man ka sngi hapoh la ki jong ki jaka puta,” bynrap u Bah Sniawbhalang.