Yn pyrkhing ka sorkar jylla ia ka jingleit bar ri da heh sorkar

Syllad | The Rising MeghalayaAugust 11, 2023

Ka jingialang ka kynhun myntri kaba la long mynta ka sngi Thohdieng ka la shim ia ka rai ban pyrkhing ha kaba iadei bad ka jingleit bar ri da ki heh sorkar khnang ban pynduna ia ka jingshah ktah ka pla tyngka ka sorkar.

Na ka liang u nongaiktien ka sorkar u Bah Paul Lyngdoh u la ong ba lada ki juh ki heh ophisar ki leit ban iashim bynta ha kino kino ki jingialang kiba long shabar jong ka ri ha ka sien kaba ar ki hap ban phah shwa ia ka progress report jong ka jingialang kaba la dep hashwa bad hadien ba la ioh ia ka jingmynjur kin sa lah ban leit iashim bynta ha ka jingialang kaba bud.

U la pyntip ruh ba ka sorkar ka la shim ruh ia ka rai ba na ka liang ka sorkar ka lah ban bei tyngka tang na ka bynta ka jingleit iashim bynta ha ka kylla kaba nyngkong, hynrei ha ka jingleit iashim bynta kaba bud ia ki jinglut jingsep dei ban bei tyngka da ka sorkar pdeng ne da ki kynhun kiba khot pynlong ia ki jingialang.

Nalor kata u la ong ruh ba kaei kaba kin hap ban pdiang ka long tang lada kita ki heh sorkar ki pynlong ia ka jingleit bar ri na ka bynta ban ioh pdiang ia kino kino ki khusnam kiba dei na ka bynta ka sorkar Meghalaya.

Ha kaba iadei bad ki dkhot ka kynhun Myntri u la ong ba ka dei ban ioh ia ka jingmynjur lyngba ka Ministry of External Affairs (MEA) bad kumba la pynshai ha kine ki khyndiat taiew ba la lah, ka MEA ka la pyrkhing bha ha kaba iadei bad ki kyndon ha kaba iadei bad kiba kum kine ki jingleit jurip bad kane ka kynthup ruh wat ia u Myntri Rangbah ka jylla.