Yn pyntreikam pura ka Tnat pulit ka Jylla ia ki ain kam bymman kiba thymmai; ong u DIG

Syllad | The Rising MeghalayaJune 28, 2024

U Deputy Inspector General of Police (Eastern Range) u Davis NR Marak u la ong ba ka Tnat pulit ka Meghalaya ka la long kaba la pynkhreh ban sdang pyntreikam pura ia ki kyndon ain kam thymmai kiba thymmai naduh ka 1 tarik u Nailur 2024.

“Haba kren halor kane, ngin sa sngewthuh ia ki jingtynjuh ba shisha ynda ngi la sdang ban pyntreikam ia ki. Hooid, ngi la pyrshang ban leh bad pynkhreh ia kaba bha tam ban pyntreikam ia kine ki ain,” ong u Marak haba kren sha ki lad pathai khubor shabar jong ka workshop kaba la long ha ka nongbah Shillong ha ka 27 tarik mynta u bnai.

U la ong ba ki la don baroh haduh 2561 ngut ki dkhot ka tnat pulit ka Jylla kiba la ioh jinghikai ha kaba iadei bad kine ki ain bathymmai kat haduh mynta. Ki heh pulit ki la ioh pdiang ia ki jinghikai halor kumno ban pyntreikam ia kine ki kyndon ain ha kaba iadei bad ki kam bymman.

Ki laitylli ki ain kam bymman bathymmai ba la mynjur da ka iingdorbar Parliament ki kynthup ia ka Bharatiya Nyaya Sanhita (BNS), ka Bharatiya Nagarik Suraksha Sanhita (BNSS), bad ka Bharatiya Sakshya Adhiniyam (BSA), ki ban mih bujli ia ka Indian Penal Code 1860, the Criminal Procedure Code 1973, bad ka Indian Evidence Act 1872.

“Ngi la lah ban pyndep ia ki jingai jinghikai na ka bynta ki heh pulit kiba dei ban pyntreikam ia kine ki ain bathymmai bad ngi kyrmen ba ki la shemphang bha ia kaei kaba ki la ioh jinghikai. Kumta ngi donkam satang ban pyntreikam ia kaei kaba ngi la ioh jinghikai,” u la ong.

Haba kylli, u DIG u la ong ba ba ki ain bathymmai mynta kiba long pyrshah ia ki kam bymman ia ki kynthei khynnah ki dei kiba la pynkhlain bha.

Shuh shuh u la ong,”Ngi don ia ka jingkyrmen kaba skhem ba kine ki ain bathymmai kin iarap ban pynduna ia ki kam bymman pyrshah ia ki kynthei khynnah.”