Yn pynshitom lada lap ba ka jingiap ka longkmie armet ha MCH Hospital Jowai ka dei na ka jingleh sting

Syllad | The Rising MeghalayaJune 18, 2025

Ka Myntri ka Tnad ka Koit ka Khiah ka Jylla, ka Kong Ampareen Lyngdoh ha ka 17 tarik Jylliew ka la ong ba ka Tnat kan shim ia ki jingpynshitom pyrshah ia ki briew kiba donkti lada ka kaiphod ka pynpaw ba ka jingiap ba dang shen jong ka longkmie armet hapoh Maternal and Child Health Hospital (MCH) ha Jowai, West Jaintia Hills District ka dei na ka jingleh sting jong ki doktor bad ki nurse

“Ngi dang ap ia ka Committee ba kan aiti ia ka kaiphod jong ka sha ka Tnad ka Koit ka Khiah. Lada ka don ka jingleh sting, kito kiba donkti kin hap ban ngat ha ka jingshah pynshitom,” ong ka Myntri haba kren sha ki lad pathai khubor.

Lah ban kdew ba kane ka longkmie armet kaba kyrteng ka (L) Pynche Bareh kaba dei na ka shnong Jalaphet ka la khlad noh ha ka 4 tarik u Jylliew hapoh kane ka hospital.

Ka Myntri ka la ong ba na ka liang kiba haiing hasem jong ka Kong Pynche ki la leit mudui sha ka Iingkashari bad na ka liang ka Meghalaya Human Rights Commission ruh ka la pan ia ka kaiphod halor kane ka jingjia.

“Ngin sa ap ia ka jingbishar, ngin sa ap bad aiti ia ka jubab ka jong ngi sha ka MHRC bad ngin la peit kumno kiei kiei kin iaid nangne shakhmat,” ka la bynrap.

Ka Kong Ampareen ka pyntip ba ka la thung ia ka Committee kaba pynkhreh ia ki kaiphod bapher bapher ia kiba yn phah sha ki kynhun bapher bapher kiba katei ka longiing ka la leit ban mudui.

“Ngi sngewsih jur ba kum kane ka jingjia ka la wan jia, bad kum ka jylla ngi hap ban pynthikna ba kiba kum kine ki jingjia kim dei ban wan jia shuh hadien habud,” ka la ong.

“Ka Sorkar ka la iakhun borbah ban khanglad ha kaba iadei bad ka jingkhlad jong ki longkmie kiba kha khunlung da kaba pyntreikam ia ki skhim bad ki sienjam bapher bapher,” bynrap shuh shuh ka Myntri.