Yn pynmih dud haduh 10000 litre na Mukhla, plie iaka jaka die dud ha Jowai

Syllad | The Rising MeghalayaNovember 18, 2021

Ka tnad Dairy Development kaba hap haka tnad Animal Husbandary and Veterinary kala pynkhreh shait shait ban shna iaka Processing Plant ne ka jaka ban pynmih iaka dud haduh 10000 litre haka shi sngi na ka shnong Mukhla, West Jaintia Hills District.

Ia kane la ong da u Director Dairy Development Bah LS Shangpliang haba kren kum u kongsan haka jingialang plie paidbah iaka jaka die dud bad ai jinghikai iaki nongdie dud kaba la pynlong da ka District Implementing Agency, Jowai halor ka phang Milk-A Complete Food ne ka dud ka jingbam kaba biang nadong shadong ban bam kaba long ha conference hall ka ophis u District Animal Husbandary and Veterinary Officer, Jowai ha Mynthong hala sngi Palei.

Ia kane ka jingai jinghikai la pynlong kum shibynta ka jingrakhe iaka jingdap 50 snem ka Jylla.

Kane ka jaka die dud kaba tip kum ka Milk Parlor ka don ha khyrdop ban rung sha ka ophis u District Animal Husbandary and Veterinary Officer, Mynthong, Jowai.

Shuh shuh u Bah Shangpliang ula ong haba kren halor ka dud ka jingbam kaba tei iaka met u briew khamtam iaki khyllung khynnah haduh kiba rangbah.

“Haduh mynta dang bun kiba ym pat shim iaka dud kum ka jingbam kaba long kongsan, hynrei haka dud kiba dih iaka ki ïoh iaka ka symboh jingbam kaba biang (balanced diet)  kaba ïarap ban tei ïaka met u briew bad ïoh ruh har rukom ki vitamin kaba ïarap ban ïakhun ïaki jingpang,” la ong u Bah Shangpliang.

U Bah Shangpliang ula ong ka India watla ka long kaba khlaiñ eh ban pynmih dud bad ka wan nyngkong haka pyrthei baroh, hynrei ka Jylla bad ka District West Jaintia Hills hi ka dang duna haka rukom pynmih dud bad dih iaka dud.

“Ka sorkar pdeng lyngba ka National Programme for Dairy Development ka iarap iaki nongri masi da kaba kyrshan bad pynkupbor iaki ban pynmih shibun ka dud kaba lah ban shna har rukom ki jingbam,” la ong u Bah Shangpliang bad bynrap “Ha West Jantia Hill ruh ka Diary Development ban pynshlur iaki nongrep kan pynkhie im iaka Milk Union khnang ba kin pyniaid hi iaka Processing Plant ha Mukhla kaban pynmih dud haduh 10000 litre haka shi sngi.”

Ka tnad Diary kan ai ka jingpynshlur iaki nongrep bad nongpynmih dud ban pyniaid iew iaka dud. Lyngba kane ka jaka pynmih kan wanrah iaka lad iohkam iohjam bad la kyntu iaki nongrep shimkhia ia kane ka kam ban kyntiew iaka ioh ka kot ialade shimet bad iaka district bad ka jylla baroh kawei, la ong u Bah Shangpliang.

Hadien ka jingialang plie la don ka jingialang ai jinghikai iaki nongdie dud kumjuh iaki nongrep.

La iadonlang ha kane ka jingialang naduh District AH Veterinary Officer, Dr DI Kjam, Senior Dairy Officer Ma B DKhar, Ma Lamphrang Pohktai Waheh Shnong Mynthong bad kiwei kiwei.