Yn pynlong ka JSU da ka jingiakhih ba shisngi bym ioh rung klas ki khynnah

Syllad | The Rising MeghalayaMay 27, 2025

Ka Jaintia Students’ Union (JSU) kan pynlong da ka jingiakhih shongkyllain mungor kaba shi sngi kynthih lashai ka sngi Balang (28 tarik Jymmang) ban pynpaw pyrshah ia ka jingbym leh ei ei ka sorkar halor ka jingbym ioh rung klas ki khynnah kiba dang shu pyndep ia ka eksam SSLC hapoh Rilum Jaintia.

Lyngba u kyrwoh ka seng ka pyntip ba ia kane ka jingiakhih yn pynlong ha lad college ha Jowai naduh ka por 11 baje mynstep kum shibynta ban pynbor ia ka sorkar ba kan shim mardor ia ki sienjam ban weng ia kane ka jingeh bad ban pynthikna ba baroh ki khynnah pule kynthup ia kito kiba wan na ki longiing kiba duna ha ka ioh ka kot ki dei ban ioh ban rung klas.

Na ka liang ka  JSU dang shen ka la ai jingmut ia ka sorkar ba kan plie noh ia ki klas miet ne evening section hapoh Kiang Nangbah Government College (Higher Secondary Section) bad ka klas step ne morning section hapoh Government Boys’ Higher Secondary School (GBHSS) khnang ban weng ia kane ka jingeh jong ka jingbym ioh rung klas ki khynnah.

Lah ban kdew ba ka jingpass bha jong ki khynnah ha kane ka eksam SSLC kaba dang shu dep ka dei ka bym lah shuh ban mutdur bad kane ka la buh jingeh shibun ia kiba bun ki samla ba kin ioh ban rung klas.