Yn pynlong ka FSS da ka jingiakop Miss Shillong 2023 bad Ms Supermom Beauty Pageant

Syllad | The Rising MeghalayaOctober 10, 2023

Ka Fashion Society Shillong (FSS) kan pynlong ia ka jingiakop thei bhabriew ba la tip kum ka “Miss Shillong 2023” bad “Ms Supermon Beauty Pageant” ha ka 14 tarik une u bnai hapoh U Soso Tham Auditorium, Shillong kaba long kum shibynta  ka jingrakhe ka jingdap 40 snem jong ka seng.

Na ka liang u Secretary, Public Relation ka FSS u Bah R.L Sohlya lyngba une u kyrwoh ba la pyllait ula pyntip ba ia kane ka jingiakop yn sdang pynlong naduh ka por 4 baje janmiet. U la ong ruh ba la dep ban pynlong ia ka audition mynta la 2 bnai tam ha kaba la lah ban jied ia ki thei bhabriew kiba don sap bad kiba la pyndep iaka jingioh jinghikai ha kaba iadei bad ka rukom kren, rukom iaid ‘Catwalk’ nalor kiwei pat ki bynta kiba iadei bad kane ka jingiakop.

Yn sdang ia kane ka jingiakop lyngba ka jingpyni ia ka riam tynrai ban sa pynbud da ka jingshad kaba la pynwandur da ka Ribha War Lyngkhoi bad ia ka Grand Finale la pynwandur da u Chris Kurbah bad ka Naphisa Pala.

Ha kajuh ka por ka FSS kan pynlong ruh ia ka Ms Supermom Beauty Pageant, ka jingiakob na ka bynta ki ‘Single Mother’ ne ki Longkmie kiba kyrshan marwei ia ka ïing bad kane ka rynsan kan pynkup burom ia ki ba kin lah ban pynurlong ia ka jingphohsniew bad ka jingangnud ka jong ki.

Ki nongjop ha ka jingiakop Miss Shillong kin ioh phong ia ka Pansngiat nalor ka song pisa kaba long  T. 1 Lak, T.75,000 bad T.50,000, katba ki nongjop ha ka Ms. Supermom kin ioh phong ia ka pansngiat nalor ka pisa T.50,000, T. 30,000 bad T. 20,000.

Ki nongjop ha kiwei pat ki bynta jong ka jingiakop kum ka Miss Beautiful Eyes, Miss Beautiful Skin, Miss Beautiful Hair, Miss Beautiful Smile bad Miss Catwalk kin ioh mar T.5000.

Shuh shuh ha  katei ka sngi, ka FSS kan pyni ruh ia ka sap jong ka Liza Lyngdoh, kaba tbit ban tem Guitar, kaba dei na ka shnong Mawkyrwat bad mynta ka Liza ka ai jinghikai tem ha Bangalore.