Yn pynlong jingiakhih ka NESO ha baroh ka thain NE bym lah pynkut ka Sorakr Pdeng ia ka jingiaumsnam ha Manipur

Syllad | The Rising MeghalayaNovember 5, 2023

Ka North East Students’ Organisation (NESO) ka la shim ia ka rai ban pynlong da ka jingiakhih ha baroh ki nongbah ki jylla ka thain shatei lammihngi (North East) ha ka 9 tarik mynta u bnai kum shibynta ban pynpaw pyrshah halor ka jingpulom jong ka Sorkar Pdeng ban pynkut noh ia ka jingiakynad kaba la neh mynta hynriew bnai kynthih ha Manipur.

U Chairman ka NESO u Bah Samuel B Jyrwa u la ong haka sngi U Blei ba na ka liang ka Seng ka pynpaw ka jingsngewkhia kaba jur halor kane ka jinglong jingman hapoh Manipur kaba dang iai bteng haduh mynta.

 “Kane ka jinglong jingman ka la wan long wat hadien hynriew bnai jong ka jingiakynad hynrei ym pat shym la lah ban wanrah pat ia ka shongsuk shongsain kaba pynpaw shai kdar halor ka jingpulom jong ka Sorkar India ban shimkhia ban tem ia kane ka jingiakynad ha ka rukom kaba dei bad kaba la wanrah ka jingiap jong kiba bun ki mynsiem briew, ka jingshah pynjulor ki jingdon jingem jong ki nongshong shnong bad kaba la ktah jur ha kaba iadei bad ka lawei jong ki khynnah bad ki samla pule,” ula ong.

 Namar kane ka jinglong jingman hapoh Manipur, u Bah Samuel u la ong ba ka NESO ha ka 31 tarik u Risaw ba ladep ka la pynlong ia ka jingialang jong ka executive council ha ka nongbah Guwahati ha kaba ka la shim ruh ia ka rai ban pynlong da ka jingiakhih ha baroh ki nongbah ki jylla ka thain North East ha ka 9 tarik mynta u bnai.

 “Ka jingkhot pynlong ia kane ka jingiakhih ka long ban pynpaw ia ka jingsngew bynniaw kaba jur halor ka jingpulom jong ka Sorkar Pdeng ban pynkut noh ia kane ka jingiaumsnam kaba la neh hynriew bnai mynta hapoh Manipur bad dawa ruh na ka Sorkar India ba kam dei ban bteng ban leh matlah hynrei ban shim ia ki lad ki lynti kumno ban weng noh mardor ia kane ka jingeh,” ong shuh shuh u Bah Jyrwa.