Yn pynkylla ka SSA ia ka lympung ialehkai Shillong Premier League

Syllad | The Rising MeghalayaMay 23, 2025

Ka Shillong Sports Association (SSA) ka la wan shakhmat ban pyntip ba kala rai ban pynkylla iaka rukom ialehkai ka Shillong Premier League (SPL) mynta ka samoi ialehkai, kata baroh ki 10 tylli ki kynhun kin khreh ban iakhun beit noh tang shi kylla ne ‘one leg’.

U Football Secretary ka SSA u Bah Fredy Kharpran haba kren sha ki lad pathai khubor u pyntip ba ka SPL mynta ka snem kan dei beit tang shi kylla, ha kaba ka team ne klob kaba ioh ban khur bun point kan ioh ban rah ia ka nam kum ka lahduh ne champion bad kaba wan ba ar kan dei ka runners-up.

Hynrei khnang ban kham kyntiew ia ka jingialehkai bad kumjuh ban khring pat ia ki paidbah, ka Tournament Committee ka la shim pat ia ka rai ban buh sa kawei pat ka jingiakhun ba la ai kyrteng Shillong Super Cup, ha kaba tang ki 6 tylli ki team ne klob kiba ioh bun point kin ioh ban ia aireng ha kane kawei pat ka jingiakob.

Kumba la batai ka daw ba la ailad tang 6 team ban iakhun ha ka Shillong Super Cup, ka long ba ki team baroh kiba iakhun ha ka SPL kin kham shimkhia ba kin ialehkai bha naduh kaba sdang jong ka samoi ialehkai khnang ban buh thong pat ialade ban kynjoh sha ka kyrdan iakhun ka Shillong Super Cup, ha kaba ka team ne klob kaba wan ha ka kyrdan kaba nyngkong bad ba ar kin rung lypa sha ka semifinal katba ki team ba bat ia ka kyrdan ba 3 haduh 6 kin hap ba kin iakhun shwa ia ka quaterfinal.

Nalor kata la pyntip ruh ba la shah ia ki team ne klob ban soi san ngut ia ki rang ialehkai na shabar ka jylla, hynrei ha ka First XI, la shah ba kin mih madan tang ar ngut.

Ha kaba iadei bad ka khusnam song pisa, u Ba Freddy u pyntip ba yn sa lah ban pynbna ia kane tad hadien ba la shong jingialang bad ka tnad treikam jong ka Finance Committee.

Nalor katta la rai ba yn sdang noh kham kloi ia kane halor ka nongrim ba ha ki samoi ialehkai ba la dep, bunsien kane ka lympung la hap ban pynsangeh noh shiteng na ka daw ba kiba bun ki rang ilehkai ki klob ki shah jied ban mihkhmat ia ka jylla kum sha ka Santosh Trophy, ne ba ju wan ban bynrap lang da ka lympung ialehkai ka |Meghjalaya State League ne MSL ka Meghalaya Football Association.

Ha kane ka sngi ka SSA kala pynbna ia la ka jong ka almanak ialehkai ka jong ka kaba dei na ka bynta kane ka samoi ialehkai kaba mynta ka samoi.

Katkum ka almanak kaba la pynbna ha kane ka sngi, ka lympung ialehkai ka ban sdang nyngkong kan dei ka U-20 ‘4th Division’ ka ban sdang naduh ka 2 tarik u bnai Jylliew u ban wan, bud pat sa ka 3rd Division ha ka 16 tarik u Jylliew, 2nd Division 7 tarik Naitung, 1st Division 15 tarik Nailur, ka lympung Shillong Premier League 14 tarik Naitung, ka Championship League cum Knockout ha u bnai Naiwieng 2025.

Nalor kine ki lympung, ka SSA kumba ka ju  long kan pynlong ruh ia ka lympung ialehkai jong ka U-16 bad U-14, U-12 (Kynthei bad Shynrang bad kumjuh ka Women’s Football ia kiba yn pynlong ha u  bnai Naiwieng bad bnai Nohprah 2025.

Ia kine ki almanak ialehkai  la pynbna ha ka jingiakynduh bad ki lad pathai khubor  ha kaba la don lang u Working President Bah Robert Dkhar, ki Vice President Bah Cliff  R. Nongrum, Bah Daniel Thangkhiew Secretary, Bah D.L Nongbri, Football Secretary,Bah Freddy Kharpran, Treasurer Bah Prosper Warjri bad kiwei kiwei ki dkhot nongkitkam jong ka Synjuk.