Yn pynkup burom ka Sorkar ia ki kynhun ba trei shitom halor ka jingjia shah pyniap ha Sohra

Syllad | The Rising MeghalayaJune 14, 2025

Ka Kynhun Myntri ka Sorkar Jylla ha ka 13 tarik Jylliew ka la shim ia ka resolution ban pynpaw ka jingsngewnguh ia ki kynhun bapher bapher, ki tnat sorkar bad khamtam ia ka bna jong ka Tnad Pulit ban pynlong ia ka jingtohkit ban lap ia ka jingshisha halor ka jingjia shah pyniap ba dang shen jong uwei u nongwan shangkai na Indore, Madhya Pradesh, u (L) Raja Raghuvanshi ha Sohra.

Haba kren sha ki lad pathai khubor, u Nongaiktien ka Sorkar uba dei ruh u Myntri u Bah Paul Lyngdoh u la ong, “Ka Kynhun Myntri ka pynpaw ka jingsngew nguh kaba khraw halor ka bynta kaba la shim da baroh ki kynhun kiba don bynta khamtam kito ki kynhun kiba iashim bynta ha ka jingwad bad kiba la don beit ha Sohra haduh kumba 15 sngi.

U pyntip ba ka Kynhun Myntri kan sa iakynduh ruh ia ki ophisar kum ka DGP lem bad ka kynhun jong ka na ka Tnad pulit ka East Khasi Hills khnang ban leh burom bad aijingithuh ia ka bynta kaba ki la shim ban pynlong ka jingtohkit ban lap ia ki jingshisha halor jong katei ka jingjia kam pyniap.

Tang hapoh ka hynniew sngi ka kynhun Special Investigation Team (SIT) ka la ioh ban kem noh ia ka kurim jong u Raja ka Sonam Raghuvanshi lem bad sawngut kiwei pat kiba donkti halor kane ka kam pyniap.

Ha kaba iadei bad ki kynhun kiba pynlong ia ka jingwad, u Bah Paul u la ong, “Da lade hi nga la iakynduh ia ki ha Sohra ha kine ki sngi ba la dep ha kaba ngi la leh burom da kaba ai ruh ia ka jingai sngewbha da ka pisa kaba mar T.15,000 sha ki volunteer kumjuh da ki syrnod.”

Ha kajuh ka por ka Kynhun Myntri ka pynpaw ruh ka jingsngewlem halor ka jingjia ba sngewsih ha kaba haduh 290 tylli ki mynsiem briew ki la duh ei na ka jinghap jong ka liengsuin Air India ha Ahmedabad.