Yn pynkhuid noh ka Sorkar jylla ia ka ram bording ka MePDCL kaba dang sah T.565 klur sha ka NTPC

Syllad | The Rising MeghalayaOctober 19, 2023

Ka Sorkar jylla kala shim ia ka rai ban siew pyndep noh ia ka ram kaba T.565 klur kaba dang pynsah sha ka National Thermal Power Corporation (NTPC) da kaba siew ha ki 20 sien siew Instalment.

Ia kane  ka jingtyrwa jong ka Tnat bording la mynjur da ka jingialang jong ka Kynhun Myntri hapoh ka jingialam jong u Myntri Rangbah ka jylla u Conrad K Sangma kaba long haka 18 tarik Risaw.

Haba iakren bad ki lad pathai khubor hadien ba la wai ka jingialang, u Myntri uba khmih ia ka Tnat bording u AT Mondal ula ong ba ka tnad kala bteng ia ka jingiakren bad ka NTPC hadien ba kala don ka jingkiew jong ka pisa kaba kot sha ka T. 665 klur kaba sahteng ban siew bad lada ailad ba kane kan bteng kumta ruh kane kan sa kynjoh sha ka T.1000 klur bad ka ban wanrah  jingeh kaba khraw ia ka Meghalaya Power Distribution Corporation Limited (MePDCL) Meghalaya Energy Corporation Limited (MeECL) bad ia ka sorkar Jylla.

“Hadien ka jingiakren bad hadien ki jingialang ba khah khah na ka liang ka jong ki (NTPC) ki la mynjur ba mynta ngi lah ban siew sha ki T.565 klur ha ka jaka jong ka T.664 lane 665 klur.

“Kumta ngi la sngew sting ha kaba iadei bad katei ka bynta hynrei ia katei ka pisa hap ban siew lyngba ka Installment ne ban siew pyndep khyndiat khyndiat haduh 20 sien” ong u Mondal bad ka bynrap ba ka NTPC kala mynjur ban map noh T. 100 Klur bad mynta ka don ka lad ban pynhiar ia ka sut ruh kumjuh.

Ha kajuh ka por ula ong ruh ba ka MeECL kam don ka jingkotbor ha kaba iadei bad ka jingdon tyngka bad kumta na ka liang ka sorkar jylla kala shim ia ka rai ban siew ia ka pisa kaba T.565 Klur sha ka NTPC.

Shuh shuh u la ong; “Ngi dang iaid hapdeng ka jingiakren bad ka NTPC ba  hato ia katei ka pisa yn hap ban siew hapoh ka jingsiew 20 sien kum ka instalment ne ngi lah ban pynjynsur ha kaba iadei bad ka jingsiew Installment khnang ba kan pynduna ruh ia ka jingkit kaba khia. Kumta ngi kwah ba hadien ka jingshim rai da ka kynhun myntri, kumta kan plie ia ka lad ban lah ban kiew sha ka 30 sien siew ne ngin iakren ban pynbun shuh shuh bad ba kan ym don shuh ka jingshim sut ia katei bad ngin pyndep ia kane ka pisa kaba sah sha ka NTPC khnang ban pynkhuid noh ia ka jingsahteng ban siew sha ka NTPC” ula ong.

Ha kajuh ka por u la pyntip ruh ba ha ki snem kiba la leit noh ka sorkar jylla kala shim ia ka ram lyngba ka Atmanirbhar bad la siew 50% ia ka pisa kaba dang sah kaba kot T.488 Klur sha ka NTPC.

Na ka liang u Myntri u la ong ruh ba na ka T.488 klur, ngi la lah ban siew T.244 klur bad kaba sah mynta kala long noh T.665 klur, bad lada kam don ka jingiakren katei ka pisa kan dang kiew bad kan pynlong ia ngi ban poi sha ka jingkyrduh pisa bad ban lait na katei ka jingjia, kumta ka sorkar kala long kaba kloi ban pdiang ia ka jingtyrwa jong ka tnad bording.Katkum ka jingpynpaw da une u Mynri la ong ba kane ka jingjia ka la mih lyngba ka jingiasoi soskular hapdeng ka sorkar jylla bad ka NTPC ha ka snem 2007.