Yn pyllait ka TRIFED ia ka wat ba ar ka PTP-NER ban kyntiew ia ki kam shna bad thain kti ha North East

Syllad | The Rising MeghalayaSeptember 22, 2023

Ka Tribal Cooperative Marketing Development Federation of India Ltd. (TRIFED) kaba hap hapoh ka Union Ministry of Tribal Affairs ha ka kylla kaba ar ne Phasi 2 kan pyntreikam ia ka skhim ‘Promotion of Tribal Products for North East Region’ (PTP-NER 2.0) naduh ka 21 tarik mynta u bnai haduh ka 10 tarik u Naiwieng 2023 kaba thmu ban kyntiew ia ki nongshna bad ki nongthain kti kiba dei ki trai shnong jong ka thain shatei lammihngi (Northeast).

Ha kane ka Phasi 2, haduh 29 tylli ki district ha ryngkat bun tylli ki kynhun ka TRIFED, ka North Eastern Handicrafts and Handlooms Development Corporation (NEHHDC) – Union Ministry of DoNER, bad ki kynhun na ki bor sorkar jylla kin leit jurip sha baroh ka thain Northeast bad hadien ka jingiakynduh ia ki nongshna bad ki nongthain kti kiba dei ki trai shnong ha kaba ryngkat lang kin lah ban pyni ia ka jingriewspah jong ka kolshor bad ki jinghiar pateng ym tang sha ka ri India hynrei sha ka pyrthei hi baroh kawei.

Na ka liang u Myntri ka sorkar pdeng uba khmih ia ka Tnat Tribal Affairs u Arjun Munda u la pyllait ia ka Central Sector Scheme ‘Marketing and Logistics Development for Promotion of Tribal Products from North -Eastern Region (PTP-NER)’, na ka bynta ka jingmyntoi jong ki trai shnong riewlum ne Schedule Tribes jong ka thain Northeast ha Manipur ha ka 18 tarik u IaIong 2023.

Ia kane ka skhim la pyniaid ha kajuh ka sngi da ka TRIFED da ka jingthmu ban pynkhlain bad phaikhmat kyrpang halor ki kabu ban kyntiew ia ka kamai kajih hdpeng ki nongshna bad ki nongthain kti ne artisan da kaba pynjur shuh shuh ia ka jingpynmih ia ki tiar ki tar lyngba ki kor jingstad bad ban plielad ia ki mar ki jong ki sha ki jaka iew.

Ha ka jingpyntreikam ia kane ka skhim (PTP-NER 1.0) ha ka kylla kaba nyngkong ne Phasi 1, phra tylli ki jylla ki la shah kynthup ha kaba la lah ban leit jurip sha ki 38 tylli ki district da ki kynhun jong ka TRIFED bad ka NEHHDC, ha ryngkat ka jingiatreilang bad ki bor sorkar jylla.

Kine ki kynhun ki la pynlong ruh haduh 64 tylli ki Tribal Artisans Empanelment Melas (TAeM) ha u bnai Iaong-Jymmang 2023.Lyngba kane ka sienjam, ka TRIFED ka la poi sha ki 2526 ngut ki artisan kiba dei na ki 44 ki kynhun jaitbynriew trai shnong, bad kynthup ia ki 1056 ngut na ki bad ithuh ia ki 1465 ngut kiwei pat na ka bynta ki jingai jinghikai.Lyngba kine la ioh pdiang ruh ia haduh 3115 tylli ki jait tiar kiba kynthup ia ki jain ba shu thain, ki mar khlaw, ki tiar ba la shna na ki siej, ki jingdeng, ki kynja khiew, ki jingdro bad kiwei pat.