Yn mih paidbah ki kolej na rilum Jaintia ha Khliehriat ba kiew sted ka jingpang HIV

Syllad | The Rising MeghalayaJuly 19, 2023

Ban pynsngewthuh ia ka jingma bad ka jingkiew sted jong ka jingpang HIV/AIDS, ka Red Ribbon Club jong ka Jaintia Eastern College, Khliehriat ryngkat ka jingiatreilang ka Meghalaya Aids Control Society (MACS) Shillong, Kyrmen Foundation, Lad Rymbai bad ka Jaintia Hills Cement Manufacturer’s Association, Thangskai kin pynlong ia ka “District Level Youth Festival 2023” ha Khliehriat haka 28-29 tarik Naitung.

Kumba 500 ngut ki samla pule na ki 11 tylli ki College kiba don ha East Jaintia Hills bad West Jaintia Hills kin wan ia shimbynta ha ki prokram bapher bapher khamtam ban pynsngewthuh paidbah halor ka jingkynrei bad jingroi sted jong ka jingpang HIV/AIDS bad kiwei kiwei ki jait jingpang kum ka jingpang Sexual Transmitted Disease (STI) ha kane ka district.

Ki program kum ka ABHIVYAKTI lane ka drama (Road Show) halor kine ki mat- Routes of HIV Transmission, Myths & Misconception related to HIV (bad ka Promotion of Helpline 1097.

Nalor kata kan don ka jingiakop Red Ribbon Quiz Competition halor ka jingpang HIV/AIDS, Marathon (Red Run 5Km). Yn sa ai buskit da ka pisa (cash prize) ia kiba jop bad ki certificate bad mementoes ia kiba ia shim bynta.

Kiba jop ha kane ka festival kin leit mihkhmat iaka rilum Jaintia ha ka State Level Youth Festival 2023. Ka matpdeng jong ka Red Ribbon Club Youth Festival 2023 kalong “Be Inspired, Own your future”

Ka jingthmu jong kane ka prokram ka long:

• Ban ai jingtip ba kham bniah halor ka jingpang HIV/AIDS.

• Ban pynduh pyndam iaka jingpang HIV/AID hapdeng ki samla

• Ban pynshlur ia ki samla bad ki nongshong shnong ban wan shakhmat ban phah test ia kane ka jingpang.

• Ban pynshlur ia ki khynnah samla shynrang bad kynthei ban long kiba la pynkhreh ban iarap ia ki briew kiba donkam snam (Blood donor).