Yn leit iashim ki nongniah kali ka Meghalaya ha ka Rainforest Challenge Goa

Syllad | The Rising MeghalayaJuly 20, 2025

Ka Meghalaya ha ka sien kaba nyngkong ka la pynkhreh ban iashim bynta ha ka Rainforest Challenge (RFC) Goa 2025, kaba dei kawei na ki jingiakop niah kali ba pawkhmat ha ka pyrthei ia kaba ju pynlong ha ki lynti ba khohruh khohram bad ki jaka ba long riat.

Ka kynhun jong ki 10 ngut ki dkhot na Meghalaya 4X4 hapoh ka lama jong ka Kmstshillong kan iaid palat 3000 kilomitar lyngba ka surok na Shillong sha Goa ha ryngkat ka phang pdeng: “From the Hills to Goa..”

Kane ka jingleit iashim bynta ka ban sah jngkynmaw ka dei kaba la kyntiew da ka Tnad Toursim ka Meghalaya bad ba la kyrshan da ka Tnad Sports & Youth Affairs bad ka Hello Meghalaya, kaba pynpaw ia ka jingpynkup bor jong ka jylla ban kyntiew ia ka kam jngohkai bad ban pynroi ia ka kolshor jong ki jingialehkai pynher kali.

Kane ka kynhun hapoh ka jingialam u Director u Bah Vicky V Kharkongor bad ruh u nongiashim bynta ha ka jingiakop pynher kali Vianney B Nongrum ka la pynkhreh ban iakhun ia ka jingakhun kaba jwat jong ka RFC kaba la tip bha halor ki jaka ktieh kiba thliew,  ki jingjam lyngba ki wah, bad ban hiar lyngba ia ki lynti khlaw kiba long riat.

Ka kynhun ba pura ka kynthup ia u  Arlan M Kharumnuid, Patsha Kharkongor, Overcome Shadap, Albinus HL Laskor, Ambet N Khonglah, Babitdor J Kharkamni, Baniaidshaphrang L Nongbri bad u Gabriel Marwein.

Ka jingleit niah kali sha kiba kum kine ki jaka la slem bha ka long palat ia kaba shu pynlut por hapoh kane ka jylla. Ki jaka khohruh khohram bad ba longriat ka jylla bad ka jingsngewtynnad jong ki nongshong shnong ka la tei ia k kolshor ha kane ka jait jingialehkai.

Ka jingiashim bynta ha ka RFC Goa kan kyntiew ia kane ka jingangnud sha ka kyrdan jong ka ri, bad ka ban buh ia ka Meghalaya ha ryngkat bad ki nongiashim bynta ba pawkhmat jong ka ri India bad ka ban plie ia ki lad ki lynti bathymmai ban pynpaw ia ka mynsiem jingangnud jong ka jylla.

Ka Rainforest Challenge Goa 2025 kan long naduh ka 28 tarik Naitung haduh ka 3 tarik Nailar, ha kaba yn pyniasoh lang ia ki nongniah kali ba tbit tam jong ka India ban iakhun pyrshah ia ki jaka khohruh khohram bad ki jaka riat kaba dei kawei na ki jiat jingiakop niah kali kaba eh tam kaba donkam ia ka jingiai shah bad ka jingtbit kaba pura.

“Kane kam dei satia tang ka jingiakop niah kali, hynrei ka dei ka thong ban buh ia ka Meghalaya ha ka map jong ka India ha ki kam iakop niah kali. Ngi kwah ban pynshlur ia ka pateng ka ban wan bad ban pyni ba ki jaka lum ki dei kiba kot bor ban ia aireng ha ki kyrdan kiba halor eh,” ong u nongialam ka kynhun u Vicky V Kharkongor.

Kane ka kynhun kan mih na Shillong ha ka 21 tarik Naitung.